Utiereň 12.6.

Utreňa

Jerej: Sláva svjaťíj jedinosúščňij, i životvorjáščij, i nerazďilímij trójci, Otcú, i Sýnu, i svjatómu Dúchu], vsehdá nýňi i prísno i vo víki vikóv.

Ľ.: Amíň.

Sláva vo výšnich Bóhu, i na zemlí mír v čelovícich blahovolénije. 3x

Hóspodi, ustňí mojí otvérzeši i ustá mojá vozvisťát chvalú tvojú. 2x

Psalóm 3.

Hóspodi, čtósja umnóžiša stužájuščiji mí? * mnózi vostájut na mjá. - Mnózi hlahóľut duší mojéj, * ňísť spasénija jemú v Bózi jehó. - Tý že, Hóspodi, zastúpnik mój jesí, * sláva mojá, i voznosjáj hlavú mojú. - Hlásom mojím ko Hóspodu vozzvách, * i uslýša mjá ot horý svjatýja svojejá. - Áz že usnúch i spách: * vostách, jáko Hóspoď zastúpit mjá. - Ne ubojúsja ot tém ľudéj, ókrest napádajuščich na mjá: * voskresní, Hóspodi, spasí mjá, Bóže mój. - Jáko tý porazíl jesí vsjá vraždújuščyja mí vsúje: * zúby hríšnikov sokrušíl jesí. - Hóspodne jésť spasénije, * i na ľúdech tvojích blahoslovénije tvojé.

Áz usnúch i spách, * vostách, jáko Hóspoď zastúpit mjá.

Psalóm 37.

Hóspodi, da ne járostiju tvojéju obličíši mené, * nižé hňívom tvojím nakážeši mené. - Jáko stríly tvojá unzóša vo mňí, * i utverdíl jesí na mňí rúku tvojú. - Ňísť iscilénija v plóti mojéj ot licá hňíva tvojehó, * ňísť míra v kostéch mojích, ot licá hrích mojích. - Jáko bezzakónija mojá prevzydóša hlavú mojú, * i jáko brémja ťážkoje oťahoťíša na mňí. - Vozsmerďíša i sohníša rány mojá, * ot licá bezúmija mojehó. - Postradách i sľakóchsja do koncá, * vés déň sítuja choždách. - Jáko ľádvija mojá napólnišasja poruhánij, * i ňísť iscilénija v plóti mojéj. - Ozlóblen bých, i smiríchsja do zilá, * rykách ot vozdychánija sérdca mojehó. - Hóspodi, préd tobóju vsé želánije mojé, * i vozdychánije mojé ot tebé ne utajísja. - Sérdce mojé smatésja, ostávi mjá síla mojá, * i svít óčiju mojéju, i tój ňísť so mnóju. - Drúzi mojí i ískrenniji mojí, * prjámo mňí priblížišasja i stáša. - I blížniji mojí ot daléče mené stáša, * i nuždáchusja íščuščiji duší mojejá. - I íščuščiji zlája mňí, hlahólachu sujetnaja, * i ľstívnym vés déň poučáchusja. - Áz že jáko hlúch ne slýšach: * i jáko ňím ne otverzájaj úst svojích. - I bých jáko čelovík ne slýšaj, * i ne imýj vo usťích svojích obličénija. - Jáko na ťá, Hóspodi, upovách, * tý uslýšiši, Hóspodi Bóže mój. - Jáko rích: da ne kohdá porádujutmisja vrazí mojí, * i vnehdá podvižátisja nohám mojím na mjá veleríčevaša. - Jáko áz na rány hotóv, * i boľízň mojá predomnóju jésť výnu. - Jáko bezzakónije mojé áz vozviščú, * i popekúsja o hrisí mojém. - Vrazí že mojí živút, i ukripíšasja páče mené, * i umnóžišasja nenavíďaščiji mja bez právdy. - Vozdajúščiji mí zlája vozblahája, obolháchu mjá, * zané hoňách blahostýňu. - Ne ostávi mené, Hóspodi Bóže mój, * ne otstupí ot mené. - Vonmí v pómošč mojú, * Hóspodi spasénija mojehó.

Ne ostávi mené, Hóspodi Bóže mój, * ne otstupí ot mené.

Vonmí v pómošč mojú, * Hóspodi spasénija mojehó.

Psalóm 62.

Bóže, Bóže mój, * k tebí útreňuju. - Vozžadá tebé dušá mojá, * kóľ mnóžiceju tebí plóť mojá. - V zemlí púsťi, i neprechódňi, i bezvódňi, * táko vo svjaťím javíchsja tebí, víďiti sílu tvojú i slávu tvojú. - Jáko lúčši mílosť tvojá páče živót, * ustňí mojí pochvalíťi ťa. - Táko blahoslovľú ťa v živoťí mojém, * o ímeni tvojém vozďižú rúci mojí. - Jáko ot túka i másti da ispólnitsja dušá mojá, * i ustnáma rádosti voschváľat ťa ustá mojá. - Ášče pominách ťa na postéli mojéj, na útrennich poučáchsja v ťa, * jáko býl jesí pomóščnik mój. - I v króvi krilú tvojéju vozrádujusja, prilpé dušá mojá po tebí, * mené že priját desníca tvojá. - Tíji že vsúje iskáša duší mojejá, vnídut v preispódňaja zemlí, * predaďátsja v rúki orúžija, části lísovom búdut. - Cár že vozveselítsja o Bózi: pochválitsja vsják klenýjsja ím, * jáko zahradíšasja ustá hlahóľuščich neprávednaja.

Na útrennich poučáchsja v ťa: * jáko býl jesí pomóščnik mój. - I v króvi krilú tvojéju vozrádujusja.

Priľpé dušá mojá po tebí, * mené že priját desníca tvojá.

Sláva, i nýňi:

Allilúia, allilúia, allilúia. Sláva tebí, Bóže. (3x)

Hóspodi, pomíluj. (3x) Sláva, i nýňi:

Psalóm 87.

Hóspodi, Bóže spasénija mojehó, * vo dní vozzvách, i v noščí préd tobóju. - Da vnídet préd ťá molítva mojá: * prikloní úcho tvojé k moléniju mojemú. - Jáko ispólnisja zól dušá mojá, * i živót mój ádu priblížisja. - Privminén bých s nizchoďáščimi v róv, * bých jáko čelovík bez pómošči vo mértvych svobóď. - Jáko jázvenniji spjáščiji vo hróbi, íchže ne pomjanúl jesí ktomú, * i tíji ot rukí tvojejá otrinovéni býša. - Položíša mja v róvi preispódňim, * v témnych i síni smértňij. - Na mňí utverdísja járosť tvojá, * i vsjá vólni tvojá navél jesí na mjá. - Událil jesí znájemych mojích ot mené, * položíša mjá mérzosť sebí. - Predán bých i ne ischoždách, * óči mojí iznemohósťi ot niščetý. - Vozzvách k tebí, Hóspodi, vés déň, * vozďích k tebí rúci mojí. - Jedá mértvymi tvoríši čudesá? * ilí vráčeve voskresját i ispovíďatsja tebí? - Jedá povísť któ v hróbi mílosť tvojú, * i ístinu tvojú v pohíbeli? - Jedá poznána búdut vo tmí čudesá tvojá, * i právda tvojá v zemlí zabvénňij? - I áz k tebí, Hóspodi, vozzvách, * i útro molítva mojá predvarít ťa. - Vskúju Hóspodi otríješi dúšu mojú, * otvraščáješi licé tvojé ot mené? -Níšč jésm áz, i v truďích ot júnosti mojejá, * voznésžesja smiríchsja i iznemohóch. - Na mňí prejdóša hňívi tvojí, * ustrašénija tvojá vozmutíša mjá. - Obydóša mja jáko vodá vés déň: * oderžáša mja vkúpi. - Událil jesí ot mené drúha i ískrenňaho, * i znájemych mojích ot strastéj.

Hóspodi Bóže spasénija mojehó, * vo dní vozzvách, i v noščí préd tobóju.

Da vnídet préd ťá molítva mojá: * prikloní úcho tvojé k moléniju mojemú.

Psalóm 102.

Blahosloví dušé mojá Hóspoda, * i vsjá vnútrenňaja mojá ímja svjatóje jehó. -Blahosloví dušé mojá Hóspoda, * i ne zabyváj vsích vozdajánij jehó. - Očiščájuščaho vsjá bezzakónija tvojá, * isciľájuščaho vsjá nedúhi tvojá. - Izbavľájuščaho ot istľínija živót tvój, * vinčájuščaho ťa mílostiju i ščedrótami. - Ispolňájuščaho vo blahích želánije tvojé, * obnovítsja jáko órľa júnosť tvojá. - Tvorjáj mílostyni Hospóď, * i sudbú vsím obídimym. - Skazá putí svojá Mojséovi, * synovóm Ízrailevym choťínija svojá. - Ščédr i mílostiv Hospóď, * dolhoterpilív i mnohomílostiv. - Ne do koncá prohňívajetsja, * nižé vo vík vraždújet. - Ne po bezzakónijem nášym sotvoríl jésť nám, * nižé po hrichóm nášym vozdál jésť nám. - Jáko po vysoťí nebésňij ot zemlí, * utverdíl jésť Hospóď mílosť svojú na bojáščichsja jehó. - Jelíko otstoját vostócy ot západ, * událil jésť ot nás bezzakónija náša. - Jákože ščédrit otéc sýny, uščédri Hóspoď bojáščichsja jehó: * jáko tój pozná sozdánije náše. - Pomjanú jáko pérsť jesmý:* čelovík jáko travá, dníje jehó jáko cvít sélnyj táko ocvitét. - Jáko dúch prójde v ném, i ne búdet, * i ne poznájet ktomú místa svojehó. - Mílosť že Hospódňa ot víka, * i do víka na bojáščichsja jehó. - I právda jehó na syňích synóv, * chraňáščich zavít jehó. - I pómňaščich zápovidi jehó, * tvoríti já. - Hóspoď na nebesí uhotóva prestól svój, * i cárstvo jehó vsími obladájet. - Blahoslovíte Hóspoda vsí Ánheli jehó, * sílniji krípostiju, tvorjáščiji slóvo jehó, uslýšati hlás slovés jehó. - Blahoslovíte Hóspoda vsjá síli jehó, * sluhí jehó tvorjáščiji vóľu jehó. -Blahoslovíte Hóspoda vsjá ďilá jehó, * na vsjácim mísťi vladýčestvija jehó, blahosloví dušé mojá Hóspoda.

Na vsjákom mísťi vladýčestvija jehó, * blahosloví dušé mojá Hóspoda.

Psalóm 142.

Hóspodi uslýši molítvu mojú, vnuší molénije mojé vo ístiňi tvojéj, * uslýši mjá v právďi tvojéj. - I ne vnídi v súd s rabóm tvojím, * jáko ne opravdítsja préd tobóju vsják živýj. - Jáko pohná vráh dúšu mojú, * smiríl jésť v zémľu živót mój. - Posadíl mjá jésť v témnych, jáko mértvyja víka, * i uný vo mňí dúch mój: vo mňí smjatésja sérdce mojé. - Pomjanúch dní drévnija: poučíchsja vo vsích ďíľich tvojích, * v tvorénijich rukú tvojéju poučáchsja. - Vozďích k tebí rúci mojí, * dušá mojá jáko zémľa bezvódnaja tebí. - Skóro uslýši mjá, Hóspodi, * isčezé dúch mój. - Ne otvratí licá tvojehó ot mené, * i upodóbľusja nizchoďáščym v róv. - Slýšanu sotvorí mňí zaútra mílosť tvojú, * jáko na ťá upovách. - Skaží mňí, Hóspodi, púť, v óň že pojdú, * jáko k tebí vzjách dúšu mojú. - Izmí mjá ot vráh mojích, Hóspodi, k tebí pribihóch,* naučí mjá tvoríti vóľu tvojú, jáko tý jesí Bóh mój. - Dúch tvój blahíj nastávit mjá na zémľu právu, * ímene tvojehó rádi, Hóspodi, živíši mjá právdoju tvojéju. - Izvedéši ot pečáli dúšu mojú, * i mílostiju tvojéju potrebíši vrahí mojá. - I pohubíši vsjá stužájuščyja duší mojéj, * jáko áz ráb tvój jésm.

Uslýši mjá, Hóspodi, v právďi tvojéj, * i ne vnídi v súd s rabóm tvojím.

Uslýši mjá, Hóspodi, v právďi tvojéj, * i ne vnídi v súd s rabóm tvojím.

Dúch tvój blahíj, * nastávit mjá na zémľu právu.

Sláva, i nýňi:

Allilúia, allilúia, allilúia. Sláva tebí, Bóže. (3x)

(Diákon ilí jeréj hlahólet jekténiju sijú. Ášče mirján molítsja, hlahólet tokmó:

Hóspodi, pomíluj. (12x) Sláva, i nýňi:)

Mírom Hóspodu pomólimsja.

Lík: Hóspodi, pomíluj. (na jedínom kójemždo prošéniji)

O svýšňim míri, i spaséniji dúš nášich, Hóspodu pomólimsja.

O míri vsehó míra, blahostojániji svjatých Bóžijich cerkvéj, i sojedinéniji vsích, Hóspodu pomólimsja.

O svjaťím chrámi sém, i s víroju, blahohovínijem, i stráchom bóžijim vchoďáščich v óň, Hóspodu pomólimsja.

O svjaťíjšem vselénsťim Archijeréji nášem (ímja rek), Pápi Rímsťim, Hóspodu pomólimsja.

O preosvjaščénňijšem Archijepískopi i Mitropolíťi nášem Kýr (ímja rék), i o bohoľubívim Jepískopi nášem Kýr (ímja rék), čéstňim presvýterstvi, vo Chrisťí dijákonstvi, o vsém príčťi i ľúdech, Hóspodu pomólimsja.

O bohochranímim naróďi nášem, o prederžáščich vlastéch nášich, i o vsém vójinstvi, Hóspodu pomólimsja.

O hráďi sém (ilí O vési séj, ilí O svjaťíj obíteli séj ), vsjákom hráďi, straňí, i víroju živúščich v ních, Hóspodu pomólimsja.

O blahorastvoréniji vozdúchov, o izobíliji plodóv zemných, i vrémeňich mírnych, Hóspodu pomólimsja.

O plávajuščich, putešéstvujuščich, nedúhujuščich, strážduščich, pľinénnych, i o spaséniji ích, Hóspodu pomólimsja.

O izbávitisja nám ot vsjákija skórbi, hňíva i núždy, Hóspodu pomólimsja.

Zastupí, spasí, pomíluj, i sochraní nás, Bóže, Tvojéju blahodátiju.

Presvjatúju, prečístuju, preblahoslovénnuju, slávnuju Vladýčicu nášu Bohoródicu i prisnoďívu Maríju, so vsími svjatými pomjanúvše, sámi sebé i drúh drúha, i vés živót náš Christú Bóhu predadím.

Lík: Tebí, Hóspodi.

Jeréj: Jáko podobájet Tebí vsjákaja sláva, čésť i poklonénije, Otcú, i Sýnu, i svjatómu Dúchu, nýňi i prísno i vo víki vikóv.

Lík: Amíň.

Bóh Hóspoď i javísja nám, blahoslovén hrjadýj vo ímja Hóspodne. (8. hlas)

Stích: Ispovídajtesja Hóspodevi, jáko bláh, jáko vo víki mílosť jehó.

Stích: Obyšédše obydóša mjá i ímenem Hóspodnim protivľáchsja ím.

Stích: Ne umrú, no žív búdu i povím ďilá Hóspodňa.

Stích: Kámeň, jehóže nebrehóša ziždúščiji, séj býsť vo hlavú úhla: ot Hóspoda býsť séj i jésť díven v očesích nášich.

Tropár voskrésnyj, hlás 8. S vysotý snizšél jesí blahoutróbne, pohrebénije prijál jesí tridnévnoje, da nás svobodíši strastéj, životé i voskresénije náše, Hóspodi sláva tebí.

Sláva: svjatým tropár, hlás 4: Íže vo vsém míri múčenik tvojích, jáko bahrjaníceju i víssom krovmí cérkov tvojá ukrasívšisja, ťími vopijét tí Christé Bóže: ľúdem tvojím ščedróty tvojá nizposlí, mír žíteľstvu tvojemú dáruj, i dušám nášym véliju mílosť.

I nýňi: Bohoródičen: Jéže ot víka utajénnoje, i ánhelom nesvídomoje tájinstvo, tobóju, Bohoródice, súščym na zemlí javísja Bóh, v neslítnom sojedinéniji voploščájem, i krest vóleju nás rádi vosprijím: ímže voskresív pervozdánnaho, spasé ot smérti dúšy náša.

Psalóm 9

Ispovímsja Tebí, Hóspodi, vsím sérdcem mojím, * povím vsjá čudesá Tvojá.

Vozveseľúsja i vozrádujusja o Tebí, * pojú ímeni Tvojemú, Výšnij.

Vnehdá vozvratítisja vrahú mojemú vspjáť, * iznemóhut i pohíbnut ot licá Tvojehó.

Jáko sotvoríl jesí súd mój i prjú mojú, * síl jesí na Prestóľi, suďáj právdu.

Zapretíl jesí jazýkom, i pohíbe nečestívyj, * ímja jehó potrebíl jesí vo vík i vo vík víka.

Vrahú oskuďíša orúžija v konéc, i hrády razrušíl jesí, * pohíbe pámjať jehó s šúmom.

I Hospóď vo vík prebyvájet, uhotóva na súd Prestól Svój, * i Tój sudíti ímať vselénňij v právdu, sudíti ímať ľúdem v pravoťí.

I býsť Hospóď pribížišče ubóhomu, * pomóščnik vo blahovrémenijich, v skórbech.

I da upovájut na Ťá znájuščiji ímja Tvojé, * jáko ne ostávil jesí vzyskájuščich Ťá, Hóspodi.

Pójte Hóspodevi, živúščemu v Sijóňi, * vozvistíte vo jazýcich načinánija Jehó.

Jáko vzyskájaj króvi ích pomjanú, * ne zabý zvánija ubóhich.

Pomíluj mjá, Hóspodi, vížď smirénije mojé ot vráh mojích, * voznosjáj mjá ot vrát smértnych.

Jáko da vozviščú vsjá chvály Tvojá vo vraťích dščére Sijóňi, * vozrádujemsja o spaséniji Tvojém.

Uhľibóša jazýcy v páhubi, júže sotvoríša, * v síti séj, júže skrýša, uvjazé nohá ích.

Znájem jésť Hospóď suďbý tvorjáj, * v ďíľich rukú svojéju uvjazé hríšnik.

Da vozvraťátsja hríšnicy vo ád, * vsí jazýcy zabyvájuščiji Bóha.

Jáko ne do koncá zabvén búdet níščij, * terpínije ubóhich ne pohíbnet do koncá.

Voskresní, Hóspodi, da ne kripítsja čelovík, * da súďatsja jazýcy préd Tobóju.

Postávi, Hóspodi, zakonopoložíteľa nád ními, * da razumíjut jazýcy, jáko čelovícy súť.

Vskúju, Hóspodi, otstojá daléče, * preziráeši vo blahovrémenjiich, v skórbech?

Vnehdá hordítisja nečestívomu, * vozharájetsja níščij, uvjazájut v sovíťich, jáže pomyšľájut.

Jáko chválim jésť hríšnyj v póchotech duší svojejá, * i obíďaj blahoslovím jesť.

Razdraží Hóspoda hríšnyj, po mnóžestvu hňíva svojehó ne vzýščet, * ňísť Bóha préd ním.

Oskverňájutsja putijé jehó na vsjákoje vrémja, * otjémľutsja suďbý Tvojá ot licá jehó, vsími vráhi svojími obladájet.

Rečé bo v sérdci svojém, * ne podvížusja ot róda v ród bez zlá,

jehóže kľátvy ustá jehó polná súť, i hóresti i ľstí, * pod jazýkom jehó trúd i boľízň.

Prisidít v lovíteľstvi s bohátymi v tájnych, * jéže ubíti nepovínnaho, óči jehó na níščaho prizirájeťi.

Lovít v tájňi jáko lév vo ohráďi svojéj, * lovít éže voschítiti níščaho,

voschítiti níščaho, * vnehdá privleščí í v síti svojéj.

Smirít jehó, preklonítsja i padét, * vnehdá jemú obladáti ubóhimi.

Rečé bo v sérdci svojém: zabý Bóh, otvratí licé Svojé, * da ne vídit do koncá.

Voskresní, Hóspodi Bóže mój, * da voznesétsja ruká Tvojá, ne zabúdi ubóhich Tvojích do koncá.

Česó rádi prohňíva nečestívyj Bóha? * Rečé bo v sérdci svojém: ne vzýščet.

Vídiši, jáko Tý boľízň i járosť smotrjáješi, * da prédan búdet v rúci Tvojí,

Tebí ostávlen jésť níščij, * síru Tý búdi pomóščnik.

Sokruší mýšcu hríšnomu i lukávomu, * vzýščetsja hrích jehó i ne obrjáščetsja.

Hospóď Cár vo vík i v vík víka, * pohíbnete, jazýcy, ot zemlí Jehó.

Želánije ubóhich uslýšal jesí, Hóspodi, * uhotóvaniju sérdca ích vňát úcho Tvojé.

Sudí síru i smirénu, * da ne priložít ktomú veličátisja čelovík na zemlí.

Psalóm Davídu, 10

Na Hóspoda upovách, káko rečéte duší mojéj: * previtáj po horám, jáko ptíca.

Jáko sé, hríšnicy naľakóša lúk, * uhotóvaša stríly v túľi, sostriľáti vo mráci právyja sérdcem.

Zané jáže Tý soveršíl jesí, oní razrušíša, * právednik že čtó sotvorí Hospóď vo chrámi svjáťim Svojém.

Hóspoď, na nebesí Prestól Jehó, * óči Jehó na níščaho prizirájeťi, víždi Jehó ispytájeťi sýny čelovíčeskija.

Ispytájet právednaho i nečestívaho, * ľúbjaj že neprávdu nenavídit svojú dúšu.

Odoždít na hríšniki síti, óhň i žúpel, * i dúch búren čásť čáši ích.

Jáko práveden Hospóď, i právdy vozľubí, * pravotý víďi licé Jehó.

Sláva, i nýňi:

Allilúia, allilúia, allilúia. Sláva tebí, Bóže. (3x)

Hóspodi, pomíluj. (3x) Sláva, i nýňi:

Psalóm Davídu, 11

Spasí mjá, Hóspodi, jáko oskuďí prepodóbnyj, * jáko umálišasja ístiny ot synóv čelovíčeskich.

Sújetnaja hlahóla kíjždo ko ískrennemu svojemú, * ustňí ľstívyja v sérdci, i v sérdci hlahólaša zlája.

Potrebít Hospóď vsjá ustný ľstívyja, * jazýk veleríčivyj,

Rékšyja: jazýk náš vozvelíčim, * ustný náša pri nás súť, któ nám Hospóď jésť?

Strásti rádi níščich i vozdychánija ubóhich nýňi voskresnú, * hlahólet Hospóď, položúsja vo spasénije, ne obiňúsja o ném.

Slovesá Hospódňa slovesá čísta, * srebró razžžéno, iskušéno zemlí, očiščéno sedmeríceju.

Tý, Hóspodi, sochraníši ný * i sobľudéši ný ot róda sehó i vo vík.

Ókrest nečestíviji chóďat; * po vysoťí Tvojéj umnóžil jesí sýny čelovíčeskija.

Psalóm Davídu, 12

Dokóľi, Hóspodi, zabúdeši mjá do koncá? * Dokóľi otvraščáješi licé Tvojé ot mené?

Dokóľi položú sovíty v dúši mojéj, boľízni v sérdci mojém déň i nóšč? * Dokóľi voznesétsja vráh mój na mjá?

Prízri, uslýši mjá, Hóspodi Bóže mój, * prosvití óči mojí, da ne kohdá usnú v smérť,

da ne kohdá rečét vráh mój: * ukripíchsja na nehó.

Stužájuščiji mí vozrádujutsja, * ášče podvížusja.

Áz že na mílosť Tvojú upovách, * vozrádujetsja sérdce mojé o spaséniji Tvojém,

vospojú Hóspodevi blahoďijavšemu mňí * i pojú ímeni Hóspoda Výšňaho.

Psalóm Davídu, 13

Rečé bezúmen v sérdce svojém: ňísť Bóh. * Rastľíša i omerzíšasja v načinánijich, ňísť tvorjáj blahostýňu.

Hospóď s Nebesé priníče na sýny čelovíčeskija, * víďiti, ášče jésť razumivájaj ilí vzyskájaj Bóha.

Vsí ukloníšasja, vkúpi nekľučími býša: * ňísť tvorjaj blahostýňu, ňísť do jedínaho.

Ni lí urazumíjut vsí ďílajuščiji bezzakónije, sňidájuščiji ľúdi mojá v sňíď chľíbá? * Hóspoda ne prizváša.

Támo ubojášasja strácha, iďíže ne bí strách, * jáko Hospóď v róďi právednych.

Sovít níščaho posramíste, * Hospóď že upovánije jehó jésť.

Któ dást ot Sijóna * spasénije Izráilevo?

Vnehdá vozvratít Hospóď pľinénije ľudéj Svojích, * vozrádujetsja Jákov, i vozveselítsja Izráiľ.

Sláva, i nýňi:

Allilúia, allilúia, allilúia. Sláva tebí, Bóže. (3x)

Hóspodi, pomíluj. (3x) Sláva, i nýňi:

Psalóm Davídu, 14

Hóspodi, któ obitájet v žilíšči Tvojém, * ilí któ vselítsja vo svjátuju hóru Tvojú?

Choďáj neporóčen i ďílajaj právdu, * hlahóľaj ístinu v sérdci svojém.

Íže ne uľstí jazýkom svojím i ne sotvorí ískrennemu svojemú zlá, * i ponošénija ne priját na blížnija svojá.

Uničižén jésť préd ním lukávnujaj, bojáščyja že sjá Hóspoda slávit, * klenýjsja ískrennemu svojemú i ne otmetájasja.

Srebrá svojehó ne dadé v lichvú i mzdý na nepovínnych ne priját. * Tvorjáj sijá ne podvížitsja vo vík.

Psalóm Davidu, 15

Sochraní mjá, Hóspodi, * jáko na Ťá upovách.

Rích Hóspodevi: Hospóď mój jesí Tý, * jáko blahích mojích ne trébuješi.

Svjátym, íže súť na zemlí Jehó, * udiví Hospóď vsjá choťínija Svojá v ních.

Umnóžišasja némošči ích, po sích uskoríša: ne soberú sobóry ích ot krovéj, * ni pomjanú že imén ích ustnáma mojíma.

Hospóď čásť dostojánija mojehó i čáši mojejá, * Tý jesí ustrojájaj dostojánije mojé mňí.

Úžja napadóša mí v deržávnych mojích, * íbo dostojánije mojé deržávno jésť mňí.

Blahoslovľú Hóspoda, vrazumívšaho mjá, * ješčé že i do nóšči nakazáša mjá utróby mója.

Predzrích Hóspoda prédo mnóju výnu, * jáko odesnúju mené jésť, da ne podvížusja.

Sehó rádi vozveselísja sérdce mojé, i vozrádovasja jazýk mój, * ješčé že i plóť mojá vselítsja na upovániji.

Jáko ne ostáviši dúšu mojú vo áďi, * nižé dási prepodóbnomu Tvojemú víďiti istľínija.

Skazál mí jesí putí životá, ispólniši mjá vesélija s licém Tvoím, * krasotá v desníci Tvojéj v konéc.

Psalóm 16

Uslýši, Hóspodi, právdu mojú, vonmí moléniju mojemú, * vnuší molítvu mojú ne vo ustnách ľstívych.

Ot licá Tvojehó suďbá mojá izýdet, * óči mojí da vídita pravotý.

Iskusíl jesí sérdce mojé, positíl jesí nóščiju, * iskusíl mjá jesí, i ne obrítesja vo mňí neprávda.

Jáko da ne vozhlahóľut ustá mojá ďíl čelovíčeskich, * za slovesá ustén Tvojích áz sochraních putí žéstoki.

Soverší stópy mojá vo stezjách Tvojích, * da ne podvížutsja stópy mojá.

Áz vozzvách, jáko uslýšal mjá jesí, Bóže, * priklóni úcho Tvojé mňí i uslýši hlahóly mojá.

Udiví mílosti Tvojá, spasájaj upovájuščyja na Ťá * ot protívjaščichsja desníci Tvojéj.

Sochraní mjá, Hóspodi, jáko zínicu óka, * v króvi krilú Tvojéju pokrýješi mjá ot licá nečestívych, ostrástšich mjá:

vrazí mojí dúšu mojú oderžáša, túk svój zatvoríša; * ustá ích hlahólaša hordýňu.

Izhoňáščiji mjá nýňi obydóša mjá, * óči svojí vozložíša ukloníti na zémľu.

Objáša mjá jáko lév hotóv na lóv * i jáko skímen obitájaj v tájnych.

Voskresní, Hóspodi, predvarí já i zapní ím, * izbávi dúšu mojú ot nečestívaho,

orúžije Tvojé * ot vráh rukí Tvojéja.

Hóspodi, ot málych ot zémli, razďilí já v živoťí ích, * i sokrovénnych Tvójich ispólnisja črévo ích,

nasýtišasja synóv, * i ostáviša ostánki mladéncem svojím.

Áz že právdoju javľúsja licú Tvojemú, * nasýščusja, vnehdá javíti mí sjá slávi Tvojéj.

Sláva, i nýňi:

Allilúia, allilúia, allilúia. Sláva tebí, Bóže. (3x)

(Diákon ilí jeréj hlahólet jekténiju sijú. Ášče mirján molítsja, hlahólet tokmó:

Hóspodi, pomíluj. (3x) Sláva, i nýňi:)

Páki i páki, mírom Hóspodu pomólimsja.

Lík: Hóspodi, pomíluj. (na jedínom kójemždo prošéniji)

Zastupí, spasí, pomíluj, i sochraní nás, Bóže, Tvojéju blahodátiju.

Presvjatúju, prečístuju, preblahoslovénnuju, slávnuju Vladýčicu nášu Bohoródicu i prisnoďívu Maríju, so vsími svjatými pomjanúvše, sámi sebé i drúh drúha, i vés živót náš Christú Bóhu predadím.

Lík: Tebí, Hóspodi.

Jeréj: Jáko Tvojá deržáva, i Tvojé jésť cárstvo i síla, i sláva Otcá i Sýna i svjatáho Dúcha, nýňi i prísno i vo víki vikóv.

Lík: Amíň.

Po 1-m stichoslóviji sidálen voskrésen,

hlás 8: Voskrésl jesí iz mértvych životé vsích, i ánhel svíta ženám vopijáše: prestánite ot sléz, apóstolom blahovistíte, vozopíjte pojúšče: jáko voskrése Christós Hospóď, blahovolívyj spastí jáko Bóh, ród čelovíčeskij.

Stích: Voskresní Hóspodi Bóže mój, da voznesétsja ruká tvojá, ne zabúdi ubóhich Tvojích do koncá.

Čelovícy Spáse hrób tvój zapečátaša, ánhel kámeň ot dvérej otvalí: žený víďiša vostávša iz mértvych, i týja blahovistíša učenikóm tvoím v Sijóňi, jáko voskrésl jesí životé vsích, i razrišíšasja úzy smértnyja: Hóspodi sláva tebí.

Sláva, i nýňi: Bohoródičen: Íže nás rádi roždéjsja ot Ďívy, i raspjátije preterpív blahíj, isprovérhij smértiju smérť, i voskresénije javléj, jáko Bóh, ne prézri jáže sozdál jesí rukóju tvojéju: javí čelovikoľúbije tvojé mílostive, prijimí róždšuju ťá Bohoródicu, moľáščujusja za ný, i spasí Spáse náš ľúdi otčájannyja.

Psalóm 17

Vozľubľú Ťá, Hóspodi, * kríposte mojá.

Hospóď utverždénije mojé, i pribížišče mojé, i Izbáviteľ Mój, * Bóh mój, Pomóščnik mój, i upováju na Nehó,

Zaščítitel mój, * i róh spasénija mojehó, i Zastúpnik mój.

Chvaľá prizovú Hóspoda * i ot vráh mojích spasúsja.

Oderžáša mjá boľízni smértnyja, i potócy bezzakónija smjatóša mjá, * boľízni ádovy obydóša mjá, predvaríša mjá síti smértnyja.

I vnehdá skorbíti mí, * prizvách Hóspoda, i k Bóhu mojemú vozzvách,

uslýša ot chráma svjatáho Svojehó hlás mój, * i vópľ mój préd Ním vnídet vo úši Jehó.

I podvížesja, i trépetna býsť zemľá, * i osnovánija hór smjatóšasja i podvihóšasja, jáko prohňívasja na ňá Bóh.

Vzýde dým hňívom Jehó, i óhň ot licá Jehó vosplámenitsja, * úhlije vozhorísja ot Nehó.

I prikloní nebesá, i sníde, * i mrák pod noháma Jehó.

I vzýde na Cheruvímy, * i leťí, leťí na krilú vítreňu.

I položí tmú zakróv Svój, ókrest Jehó selénije Jehó, * temná vodá vo óblacich vozdúšnych.

Ot oblistánija préd Ním óblacy proidóša, * hrád i úhlije óhnennoje.

I vozhremí s nebesé Hospóď * i Výšnij dadé hlás Svój.

Nizposlá stríly i razhná já, * i mólniji umnóži, i smjaté já.

I javíšasja istóčnicy vodníji, i otkrýšasja osnovánija vselénnyja, * ot zapreščénija Tvojehó, Hóspodi, ot dochnovénija dúcha hňíva Tvojehó.

Nizposlá s vysotý, i priját mjá, * vospriját mjá ot vód mnóhich.

Izbávit mjá ot vrahóv mojích síľnych i ot nenavíďaščich mjá, * jáko utverdíšasja páče mené.

Predvaríša mjá v déň ozloblénija mojehó, * i býsť Hospóď utverždénije móje.

I izvedé mjá na širotú, * izbávit mjá, jáko voschoťí mjá.

I vozdást mí Hospóď po právďi mojéj * i po čistoťí rukú mojéju vozdást mí.

Jáko sochraních putí Hospódni * i ne nečéstvovach ot Bóha mojehó.

Jáko vsjá suďbý Jehó prédo mnóju * i opravdánija Jehó ne otstupíša ot mené.

I búdu neporóčen s Ním, * i sochraňúsja ot bezzakónija mojehó.

I vozdást mí Hospóď po právďi mojéj * i po čistoťí rukú mojéju préd očíma Jehó.

S prepodóbnym prepodóben búdeši, * i s múžem nepovínnym nepovínen búdeši, i so izbránnym izbrán búdeši, i so stroptívym razvratíšisja.

Jáko Tý ľúdi smirénnyja spaséši * i óči hórdych smiríši.

Jáko Tý prosvitíši svitíľnik mój, Hóspodi, Bóže mój, * prosvitíši tmú mojú.

Jáko Tobóju izbávľusja ot iskušénija * i Bóhom mojím prejdú sťínu.

Bóh mój, neporóčen púť Jehó, slovesá Hospódňa razžžéna, * Zaščítiteľ jésť vsích upovájuščich na Nehó.

Jáko któ Bóh, rázvi Hóspodá, Ilí kto Bóh, rázvi Bóha nášehó? * Bóh prepojasújaj mjá síloju, i položí neporóčen púť mój.

Soveršájaj nózi mojí, jáko jeléni, * i na vysókich postavľájaj mjá.

Naučájaj rúci mojí na bráň, * i položíl jesí lúk míďan mýšca mojá.

I dál mi jesí zaščiščénije spásenija, * i desníca Tvojá vospriját mjá,

i nakazánije Tvojé isprávit mjá v konéc, * i nakazánije Tvojé tó mjá naučít.

Uširíl jesí stopý mojá pódo mnóju, * i ne iznemohósťi plesňí mojí.

Poženú vrahí mojá, i postíhnu já, * i ne vozvraščúsja, dóndeže skončájutsja.

Oskorbľú ích, i ne vozmóhut státi, * padút pod noháma mojíma.

I prepojásal mjá jesí síloju na bráň, * spjál jesí vsjá vostajúščyja na mjá pod mjá.

I vrahóv mojích dál mí jesí chrebét, * i nenavíďaščyja mjá potrebíl jesí.

Vozzváša, i ne bí spasájaj: * ko Hóspodu, i ne uslýša ích.

I istňú já jáko prách préd licém vítra, * jáko brénije putéj pohláždu já.

Izbáviši mjá ot prerikánija ľudéj, * postáviši mjá vo hlavú jazýkov.

Ľúdije, íchže ne víďich, rabótaša mí. * V slúch úcha poslúšaša mjá.

Sýnove čuždíji solháša mí. * Sýnove čuždíji obetšáša i ochromóša ot stéz svojích.

Žív Hospóď, i blahoslovén Bóh, * i da voznesétsja Bóh spasénija mojehó.

Bóh dajáj otmščénije mňí * i pokorívyj ľúdi pod mjá.

Izbáviteľ mój ot vráh mojích hňivlívych, * ot vostajúščich na mjá vozneséši mjá, ot múža neprávedna izbáviši mjá.

Sého rádi ispovímsja Tebí vo jazýcich, Hóspodi, * i ímeni Tvojemú pojú:

veličájaj spasénija caréva, * i tvórjaj mílosť christú svojemú Davídu, i símeni jehó do víka.

Sláva, i nýňi:

Allilúia, allilúia, allilúia. Sláva tebí, Bóže. (3x)

Hóspodi, pomíluj. (3x) Sláva, i nýňi:

Psalóm 18

Nebesá povídajut slávu Bóžiju, * tvorénije že rukú Jehó vozviščájet tvérď.

Déň dní otryhájet hlahól, * i nóšč nóšči vozviščájet rázum.

Ne súť ríči, nižé slovésa, * íchže ne slýšatsja hlási ích.

Vo vsjú zémľu izýde viščánije ích * i v koncý vsélennyja hlahóly ích.

V sólnce položí selénije svojé, i tój, jáko ženích ischoďáj ot čertóha Svojehó, * vozrádujetsja, jáko ispolín teščí púť.

Ot krája nebesé ischód Jehó, i srítenije Jehó do krája nebesé, * i ňísť íže ukrýjetsja teplotý Jehó.

Zakón Hospódeň neporóčen, obraščájaj dúšy, * sviďíteľstvo Hospódne vírno, umudrjájuščeje mladéncy.

Opravdánija Hospódňa práva, veseľáščaja sérdce, * zápoviď Hospódňa svitlá, prosviščájuščaja óči.

Strách Hospódeň číst, prebyvájaj vo vík víka: * suďbý Hospódni ístinny, opravdány vkúpi,

voždeľínny páče zláta i kámene čéstna mnóha, * i sláždša páče méda i sóta.

Íbo ráb Tvój chranít já, vnehdá sochraníti já, * vozdajánije mnóho.

Hrichopadénija któ razumíjet? * ot tájnych mojích očísti mjá, i ot čuždích poščadí rabá Tvojehó,

ášče ne obladájut mnóju, tohdá neporóčen búdu * i očíščusja ot hrichá velíka.

I búdut vo blahovolénije slovesá úst mojích, i poučénije sérdca mojehó préd Tobóju výnu, * Hóspodi, Pomóščniče mój i Izbáviteľu mój.

Psalóm 19

Uslýšit ťá Hospóď v déň pečáli, * zaščítit ťá ímja Bóha Jákovľa.

Póslet tí pómošč ot Svjatáho * i ot Sijóna zastúpit ťá.

Pomjanét vsjáku žértvu tvojú, * i vsesožžénije tvojé túčno búdi.

Dást tí Hospóď po sérdcu tvojemú * i vés sovít tvój ispólnit.

Vozrádujemsja o spaséniji tvojém * i vo ímja Hóspoda Bóha nášeho vozvelíčimsja.

Ispólnit Hospóď vsjá prošénija tvojá. * Nýňi poznách, jáko spasé Hospóď christá Svojehó,

uslýšit jehó s nebesé svjatáho Svojehó, * v sílach spasénije desnícy Jehó.

Síji na kolesnícach, i síi na kóňich, * mý že vo ímja Hóspoda Bóha nášeho prizovém.

Tíji spjáti býša i padóša, * mý že vostáchom i isprávichomsja.

Hóspodi, spasí carjá i uslýši ný, * vóňže ášče déň prizovém Ťá.

Psalóm 20

Hóspodi, síloju Tvojéju vozveselítsja cár * i o spaséniji Tvojém vozrádujetsja ziló.

Želánije sérdca jehó dál jesí jemú, * i choťínija ustnú jehó ňísi lišíl jehó.

Jáko predvaríl jesí jehó blahoslovénijem blahostýnnym, * položíl jesí na hlaví jehó vinéc ot kámene čéstna.

Životá prosíl jésť u Tebé, * i dál jesí jemú dolhotú dníj vo vík víka.

Vélija sláva jehó spasénijem Tvojím, * slávu i veleľípije vozložíši na nehó.

Jáko dási jemú blahoslovénije vo vík víka, * vozveselíši jehó rádostiju s licém Tvoím.

Jáko cár upovájet na Hóspoda, * i mílostiju Výšňaho ne podvížitsja.

Da obrjáščetsja ruká Tvojá vsím vrahóm Tvojím, * desníca Tvojá da obrjáščet vsjá nenavíďaščyja Tebé.

Jáko položíši ích jáko péšč óhnennuju vo vrémja licá Tvojehó, * Hospóď hňívom Svojím smjatét já, i sňísť ích óhň.

Plód ích ot zemlí pohubíši, * i símja ích ot synóv čelovíčeskich.

Jáko ukloníša na Ťá zlája, * pomýsliša sovíty, íchže ne vozmóhut sostáviti.

Jáko položíši já chrebét, * vo izbýtcich Tvojích uhotóviši licé ích.

Voznesísja, Hóspodi, síloju Tvojéju, * vospojém i pojém síly Tvojá.

Sláva, i nýňi:

Allilúia, allilúia, allilúia. Sláva tebí, Bóže. (3x)

Hóspodi, pomíluj. (3x) Sláva, i nýňi:

Psalóm 21

Bóže, Bóže mój, vonmí mí, * vskúju ostávil mjá jesí?

Daléče ot spasénija mojehó * slovesá hrichopadénij mojích.

Bóže mój, vozzovú vo dní, i ne uslýšiši, * i v noščí, i ne v bezúmije mňí.

Tý že vo svjaťím živéši, * chvaló Izráileva.

Na Ťá upováša otcý náši, * upováša i izbávil jesí já.

K Tebí vozzváša, i spasóšasja, * na Ťá upováša, i ne postyďíšasja.

Áz že jésm čérv, a ne čelovík, * ponošénije čelovíkov i uničižénije ľudéj.

Vsí víďaščiji mjá poruháša mí sjá, * hlahólaša ustnámi, pokiváša hlavóju:

upová na Hóspoda, da izbávit jehó, * da spasét jehó, jáko chóščet jehó.

Jáko Tý jesí istórhij mjá iz čréva, * upovánije mojé ot soscú mátere mojejá.

K Tebí privéržen jésm ot ložésn, * ot čréva mátere mojejá Bóh mój jesí Tý.

Da ne otstupíši ot mené, jáko skórb blíz, * jáko ňísť pomohájaj mí.

Obydóša mjá teľcý mnózi, * juncý túčniji oderžáša mjá.

Otverzóša na mjá ustá svojá, * jáko lév voschiščájaj i rykájaj.

Jáko vodá izlijáchsja, i razsýpašasja vsjá kósti mojá, * býsť sérdce mojé jáko vósk, tájaj posreďí čréva mojehó.

Ízsše jáko skudéľ kríposť mojá, i jazýk mój priľpé hortáni mojemú, i v pérsť smérti svél mjá jesí.

Jáko obydóša mjá psí mnózi, sónm lukávych oderžáša mjá, * iskopáša rúci mojí i nózi mojí.

Isčetóša vsjá kósti mojá, * tíji že smotríša i prezríša mjá.

Razďilíša rízy mojá sebí, * i o odéždi mojéj metáša žrébij.

Tý že, Hóspodi, ne udalí pómošč Tvojú ot mené, * na zastuplénije mojé vonmí.

Izbávi ot orúžija dúšu mojú, * i iz rukí pésiji jedinoródnuju mojú.

Spasí mjá ot úst ľvóvych * i ot róh jedinoróž smirénije mojé.

Povím ímja Tvojé brátiji mojéj, * posreďí cérkve vospojú Ťá.

Bojáščijisja Hóspoda, voschvalíte Jehó, vsé símja Iákovle, proslávite Jehó, * da uboítsja že ot Nehó vsé símja Izráilevo.

Jáko ne uničiží, nižé nehodová molítvy níščaho, * nižé otvratí licé Svojé ot mené, i jehdá vozzvách k Nemú, uslýša mjá.

Ot Tebé pochvalá mojá, v cérkvi velícij ispovímsja Tebí, * molítvy mojá vozdám préd bojáščimisja Jehó.

Jaďát ubóziji i nasýťatsja, i voschváľat Hóspoda vzyskájuščiji Jehó, * živá búdut serdcá ích v vík víka.

Pomjanútsja i obraťátsja ko Hospódu vsí koncý zemlí, * i poklóňatsja préd Ním vsjá otéčestvija jazýk.

Jáko Hospódne jésť cárstvije, * i Tój obladájet jazýki.

Jadóša i pokloníšasja vsí túčniji zemlí, * préd Ním pripadút vsí nizchoďáščiji v zémľu, i dušá mojá Tomú živét.

I símja mojé porabótajet Jemú, * vozvistít Hóspodevi ród hrjadúščij.

I vozvisťát právdu Jehó ľúdem róždšymsja, * jáže sotvorí Hospóď.

Psalóm 22

Hospóď pasét mjá * i ničtóže má lišít.

Na mísťi zláčňi, támo vselí mjá, * na voďí pokójňi vospitá mjá.

Dúšu mojú obratí, nastávi mjá na stezí právdy, * ímene rádi Svojehó.

Ášče bo i pojdú posreďí síni smértnyja, * ne ubojúsja zlá,

jáko Tý so mnóju jesí: * žézl Tvój i pálica Tvojá, tá mjá uťíšista.

Uhotóval jesí prédo mnóju trapézu soprotív stužájuščym mňí, * umástil jesí jeléjom hlavú mojú, i čáša Tvojá upojavájušči mjá, jáko deržávna.

I mílosť Tvojá poženét mjá vsjá dní životá mojehó; * i jéže vselíti mí sjá v dóm Hospódeň v dolhotú dníj.

Psalóm 23

Hospódňa zemľá, i ispolnénije jejá, vsélennaja * i vsí živúščiji na néj.

Tój na morjách osnovál jú jésť, * i na rikách uhotóval jú jésť.

Któ vzýdet na hóru Hospódňú? * Ilí któ stánet na mísťi svjaťím Jehó?

Nepovínen rukáma i číst sérdcem, íže ne priját vsúje dúšu svojú, * i ne kľátsja léstiju ískrennemu svojemú.

Séj priímet blahoslovénije ot Hóspoda, * i mílostyňu ot Bóha, Spása svojehó.

Séj ród íščuščich Hóspoda, * íščuščich licé Bóha Jákovľa.

Vozmíte vratá kňázi váša, * i vozmítesja vratá víčnaja, i vnídet Cár slávy.

Któ jésť séj Cár slávy? * Hospóď krípok i sílen, Hospóď sílen v bráni.

Vozmíte vráta kňázi váša, i vozmítesja vratá víčnaja, * i vnídet Cár slávy.

Któ jésť séj Cár slávy? * Hospóď síl, Tój jésť Cár slávy.

Sláva, i nýňi:

Allilúia, allilúia, allilúia. Sláva tebí, Bóže. (3x)

(Diákon ilí jeréj hlahólet jekténiju sijú. Ášče mirján molítsja, hlahólet tokmó:

Hóspodi, pomíluj. (3x) Sláva, i nýňi:)

Páki i páki, mírom Hóspodu pomólimsja.

Lík: Hóspodi, pomíluj. (na jedínom kójemždo prošéniji)

Zastupí, spasí, pomíluj, i sochraní nás, Bóže, Tvojéju blahodátiju.

Presvjatúju, prečístuju, preblahoslovénnuju, slávnuju Vladýčicu nášu Bohoródicu i prisnoďívu Maríju, so vsími svjatými pomjanúvše, sámi sebé i drúh drúha, i vés živót náš Christú Bóhu predadím.

Lík: Tebí, Hóspodi.

Jeréj: Jáko bláh i čelovikoľúbec Bóh jesí, i Tebí slávu vozsylájem Otcú i Sýnu i svjatómu Dúchu, nýňi i prísno i vo víki vikóv.

Lík: Amíň.

Po 2-m stichoslóviji sidálen,

hlás 8. Podóben: Povelénnoje tájno: Bilonosjáj Havrijíl svítel predstá, jáko v víďi mólniji, Christóvu hróbu, i kámeň otvalí ot hróba, i strách vélij soderžáše tvojá stráži, i vnezápu prebýša vsí áki mértvi. Ot hróba strážej, i kámene pečáti ustydítesja prebezzakónniji, razumíjte, jáko voskrése Christós.

Druhíj sidálen. Podóben: premúdrosti slóva: Voskrés ot hróba jáko voístinnu, prepodóbnym poveľíl jesí ženám propovídati vostánije apóstolom, jákože písano jésť: i skóryj Pétr predstá hróbu, i svít vo hróbi zrjá užasášesja. Ťímže i víďiv plaščanícy jedíny, kromí božéstvennaho ťíla, v ném ležáščyja, so stráchom vozopí: sláva tebí Christé Bóže, jáko spasáješi vsjá Spáse náš, Ótčeje bo jesí sijánije.

Sláva, i nýňi: Bohoródičen [ne siďášče pojém, no stojášče i so stráchom i blahohovénijem hlahólem] nastojáščij:

O tebí rádujetsja blahodátnaja vsjákaja tvár, ánheľskij sobór, i čelovíčeskij ród: osvjaščénnyj chráme, i rajú slovésnyj, ďívstvennaja pochvaló, iz nejáže Bóh voplotísja, i mladénec býsť, préžde vík sýj Bóh náš: ložesná bo tvojá prestól sotvorí, i črévo tvojé prostránneje nebés soďíla. O tebí rádujetsja blahodátnaja, vsjákaja tvár, sláva tebí.

Allilúija, Pasalóm 118.

Bláženi neporóčniji v púti, * choďáščiji v zakóňi Hospódni.

Blažéni ispytájuščiji sviďínija Jehó, vsím sérdcem vzýščut Jehó, * ne ďílajuščiji bo bezzakónija, v putéch Jehó chodíša.

Tý zapovídal jesí zápovidi Tvojá * sochraníti ziló.

Dabý isprávilisja putijé mojí, * sochraníti opravdánija Tvojá.

Tohdá ne postyžúsja, * vnehdá prizríti mí na vsjá zápovidi Tvojá.

Ispovímsja Tebí v právosti sérdca, * vnehdá naučíti mí sjá suďbám právdy Tvojejá.

Opravdánija Tvojá sochraňú, * ne ostávi mené do zilá.

V česóm isprávit juňíjšij púť svój? * vnehdá sochraníti slovesá Tvojá.

Vsím sérdcem mojím vzyskách Tebé, * ne otríni mené ot zápovidej Tvojích.

V sérdci mojém skrých slovesá Tvojá, * jáko da ne sohrišú Tebí.

Blahoslovén jesí, Hóspodi: * naučí mjá opravdánijem Tvojím.

Ustnáma mojíma vozvistích * vsjá suďbý úst Tvojích.

Na putí sviďínij Tvoích nasladíchsja, * jáko o vsjákom bohátstvi.

V zápovidech Tvoích pohlumľúsja, * i urazumíju putí Tvojá.

Vo opravdánijich Tvojích poučúsja, * ne zabúdu slovés Tvojích.

Vozdážď rabú Tvojemú: * živí mjá, i sochraňú slovesá Tvojá.

Otkrýj óči mojí, * i urazumíju čudésa ot zakóna Tvojehó.

Prišléc áz jésm na zemlí: * ne skrýj ot mené zápovidi Tvojá.

Vozľubí dušá mojá vozželáti suďbý Tvojá * na vsjákoje vrémja.

Zapretíl jesí hórdym: * prókľati ukloňájuščijisja ot zápovidej Tvojích.

Otimí ot mené ponós i uničižénije, * jáko sviďínij Tvojích vzyskách.

Íbo sidóša kňázi, i na mjá klevetáchu, * ráb že Tvój hlumľášesja vo opravdánijich Tvojích:

Íbo sviďínija Tvojá poučénije mojé jésť, * i sovíti mojí opravdánija Tvojá.

Priľpé zemlí dušá mojá: * živí mjá po slovesí Tvojemú.

Putí mojá vozvistích, i uslýšal mjá jesí: * naučí mjá opravdánijem Tvojím:

Púť opravdánij Tvoích vrazumí mí, * i pohlumľúsja v čudesích Tvojích.

Vozdremá dušá mojá ot unýnija: * utverdí mjá v slovesích Tvojích.

Púť neprávdy otstávi ot mené, * i zakónom Tvojím pomíluj mjá.

Púť ístiny izvólich, * i suďbý Tvojá ne zabých.

Priľipíchsja sviďínijem Tvojím, Hóspodi, * ne posramí mené.

Púť zápovidej Tvojích tekóch, * jehdá rasšíril jesí sérdce mojé.

Zakonopoloží mňí, Hóspodi, * púť opravdánij Tvoích, i vzyščú i výnu:

Vrazumí mjá, i ispytáju zakón Tvój, * i sochraňú í vsím sérdcem mojím.

Nastávi mjá na stezjú zápovidej Tvoích, * jáko túju voschoťích.

Prikloní sérdce mojé vo sviďínija Tvojá, * a ne v lichoímstvo.

Otvratí óči mojí, jéže ne víďiti sujetý, * v putí Tvojém živí mjá.

Postaví rabú Tvojemú * slóvo Tvojé v strách Tvój.

Otimí ponošénije mojé, * jéže nepščevách: jáko suďbý Tvojá bláhi.

Sé vozželách zápovidi Tvojá, * v právďi Tvojéj živí mjá.

I da priídet na mjá mílosť Tvojá, * Hóspodi, spasénije Tvojé po slovesí Tvojemú.

I otviščáju ponošájuščym mí slóvo: * jáko upovách na slovesá Tvojá.

I ne otimí ot úst mojích slovesé ístinna do zilá, * jáko na suďbý Tvojá upovách.

I sochraňú zakón Tvój výnu, * vo vík i vo vík víka.

I choždách v širóťi, * jáko zápovidi Tvojá vzyskách.

I hlahólach o sviďínijich Tvojích pred carí, * i ne styďáchsja:

I poučáchsja v zápovidech Tvoích, * jáže vozľubích ziló:

I vozdvihóch rúci mojí k zápovidem Tvoím, jáže vozľubích, * i hlumľáchsja vo opravdánijich Tvoích.

Pomjaní slovesá Tvojá rabú Tvojemú, * íchže upovánije dál mí jesí.

Tó mjá uťíši vo smiréniji mojém, * jáko slóvo Tvojé živí mjá.

Hórdii zakonoprestúpovachu do zilá: * ot zakóna že Tvojehó ne ukloníchsja.

Pomjanúch suďbý Tvojá ot víka, Hóspodi, * i uťíšichsja.

Pečáľ priját mjá ot hríšnik, * ostavľájuščich zakón Tvój.

Píta bjáchu mňí opravdánija Tvojá, * na mísťi prišéľstvija mojehó.

Pomjanúch v noščí ímja Tvojé, Hóspodi, * i sochraních zakón Tvój.

Séj býsť mňí, * jáko opravdánij Tvoích vzyskách.

Čásť mojá jesí, Hóspodi, * rích sochraníti zakón Tvój.

Pomolíchsja licú Tvojemú vsím sérdcem mojím: * pomíluj mjá po slovesí Tvojemú.

Pomýslich putí Tvojá, * i vozvratích nózi mojí vo sviďínija Tvojá.

Uhotóvichsja i ne smutíchsja * sochraníti zápovidi Tvojá.

Úžja hríšnik objazášasja mňí, * i zakóna Tvojehó ne zabých.

Polúnošči vostách ispovídatisja Tebí * o suďbách právdy Tvojejá.

Pričástnik áz jésm vsím bojáščymsja Tebé, * i chraňáščym zápovidi Tvojá.

Mílosti Tvojejá, Hóspodi, ispólň zemľá: * opravdánijem Tvoím naučí mjá.

Bláhosť sotvoríl jesí s rabóm Tvojím, Hóspodi, * po slovesí Tvojemú.

Bláhosti, i nakazániju i rázumu naučí mjá, * jáko zápovidem Tvojím vírovach.

Préžde dáže ne smiríti mí sjá, áz prehriších: * sehó rádi slóvo Tvojé sochraních.

Bláh jesí Tý, Hóspodi, * i bláhostiju Tvojéju naučí mjá opravdánijem Tvojím.

Umnóžisja na mjá neprávda hórdych, * áz že vsím sérdcem mojím ispytáju zápovidi Tvojá.

Usyrísja jáko mléko sérdce ích, * áz že zakónu Tvojemú poučíchsja.

Bláho mňí, jáko smiríl mjá jesí, * jáko da naučúsja opravdánijem Tvojím.

Bláh mňí zakón úst Tvojích, * páče týsjašč zlatá i srebrá.

Sláva, i nýňi:

Allilúia, allilúia, allilúia. Sláva tebí, Bóže. (3x)

Hóspodi, pomíluj. (3x)

Sláva, i nýňi:

Rúci Tvoí sotvorísťi mjá, i sozdásťi mjá: * vrazumí mjá, i naučúsja zápovidem Tvojím.

Bojáščijisja Tebé úzrjat mjá i vozveseľátsja, * jáko na slovesá Tvojá upovách.

Razumích Hóspodi, jáko právda suďbý Tvojá, * i voístinnu smiríl mjá jesí.

Búdi že mílosť Tvojá, * da uťíšit mjá po slovesí Tvojemú, rabú Tvojemú.

Da priídut mňí ščedróty Tvojá, i žív búdu, * jáko zakón Tvój poučénije mojé jésť.

Da postyďátsja hórdiji, jáko neprávedno bezzakónnovaša na mjá, * áz že pohlumľúsja v zápovidech Tvojích.

Da obraťát mjá bojáščijisja Tebé, * i víďaščiji sviďínija Tvojá.

Búdi sérdce mojé neporóčno vo opravdánijich Tvojích, * jáko da ne postyžúsja.

Isčezájet vo spasénije Tvojé dušá mojá, * na slovesá Tvojá upovách.

Isčezóša óči mojí v slóvo Tvojé, * hlahóľušče: kohdá uťíšiši mjá?

Zané bých jáko mích na sláňi: * opravdánij Tvoích ne zabých.

Kolíko jésť dnéj rabá Tvojehó? * kohdá sotvoríši mí ot hoňáščich mjá súd?

Povídaša mňí zakonoprestúpnicy hlumlénija, * no ne jáko zakón Tvój, Hóspodi.

Vsjá zápovidi Tvojá ístina: * neprávedno pohnáša mjá, pomozí mí.

Vmáľi ne skončáša mené na zemlí: * áz že ne ostávich zápovidej Tvojích.

Po mílosti Tvojéj živí mjá, * i sochraňú sviďínija úst Tvojích.

Vo vík, Hóspodi, slóvo Tvojé * prebyvájet na nebesí.

V ród i ród ístina Tvojá. * Osnovál jesí zémľu, i prebyvájet.

Učinénijem Tvojím prebyvájet déň, * jáko vsjáčeskaja rabótna Tebí.

Jáko ášče by ne zakón Tvój poučénije mojé býl, * tohdá úbo pohíbl bých vo smiréniji mojém.

Vo vík ne zabúdu opravdánij Tvojích, * jáko v ních oživíl mjá jesí.

[Sredá:]

Tvój jésm áz, spasí mjá, * jáko opravdánij Tvoích vzyskách.

Mené ždáša hríšnicy pohubíti mjá, * sviďínija Tvojá razumích.

Vsjákija končíny víďich konéc, * široká zápoviď Tvojá ziló.

Kóľ vozľubích zakón Tvój, Hóspodi, * vés déň poučénije mojé jésť.

Páče vráh mojích umudríl mjá jesí * zápovidiju Tvojéju, jáko v vík mojá jésť.

Páče vsích učáščich mjá razumích, * jáko sviďínija Tvojá poučénije mojé jésť.

Páče stárec razumích, * jáko zápovidi Tvojá vzyskách.

Ot vsjákaho putí lukáva vozbraních nohám mojím, * jáko da sochraňú slovesá Tvojá.

Ot sudéb Tvojích ne ukloníchsja, * jáko Tý zakonopoložíl mí jesí.

Kóľ sladká hortáni mojemú slovesá Tvojá, * páče méda ustóm mojím.

Ot zápovidej Tvojích razumích, * sehó rádi voznenavíďich vsják púť neprávdy.

Svitíľnik noháma mojíma zakón Tvój, * i svít stezjám mojím.

Kľáchsja i postávich * sochraníti suďbý právdy Tvojejá.

Smiríchsja do zilá, Hóspodi, * živí mjá po slovesí Tvojemú.

Vóľnaja úst mojích blahovolí že, Hóspodi, * i suďbám Tvoím naučí mjá.

Dušá mojá v rukú Tvojéju výnu, * i zakóna Tvojehó ne zabých.

Položíša hríšnicy síť mňí, * i ot zápovidej Tvojích ne zabludích.

Nasľídovach sviďínija Tvojá vo vík, * jáko rádovanije sérdca mojehó súť.

Prikloních sérdce mojé sotvoríti opravdánija Tvojá * v vík za vozdajánije.

Zakonoprestúpnyja voznenavíďich, * zakón že Tvój vozľubích.

Pomóščnik mój i zastúpnik mój jesí Tý, * na slovesá Tvojá upovách.

Uklonítesja ot mené lukávnujuščiji, * i ispytáju zápovidi Bóha mojehó.

Zastupí mjá po slovesí Tvojemú, * i žív búdu, i ne posramí mené ot čájanija mojehó.

Pomozí mí, i spasúsja, * i poučúsja vo opravdánijich Tvoích výnu.

Uničižíl jesí vsjá otstupájuščija ot opravdánij Tvojích, * jáko neprávedno pomyšlénije ích.

Prestupájuščija nepščevách vsjá hríšnyja zemlí, * sehó rádi vozľubích sviďínija Tvojá.

Prihvozdí stráchu Tvojemú plóti mojá, * ot sudéb bo Tvojích ubojáchsja.

Sotvorích súd i právdu, * ne predážď mené obíďaščym mjá.

Vospriimí rabá Tvojehó vo bláho, * da ne oklevetájut mené hórdiji.

Óči mojí isčezósťi vo spasénije Tvojé, * i v slóvo právdy Tvojejá.

Sotvorí s rabóm Tvojím po mílosti Tvojéj, * i opravdánijem Tvojím naučí mjá.

Ráb Tvój jésm áz: vrazumí mjá, * i uvím sviďínija Tvojá.

Vrémja sotvoríti Hóspodevi: * razoríša zakón Tvój.

Sehó rádi vozľubích zápovidi Tvojá * páče zláta i topázija.

Sehó rádi ko vsím zápovidem Tvojím napravľáchsja, * vsják púť neprávdy voznenavíďich.

Dívna sviďínija Tvojá, * sehó rádi ispytá já dušá mojá.

Javlénije slovés Tvojích prosviščájet * i vrazumľájet mladéncy.

Ustá mojá otverzóch, i privlekóch dúch, * jáko zápovidej Tvojích želách.

Sláva, i nýňi:

Allilúia, allilúia, allilúia. Sláva tebí, Bóže. (3x)

Hóspodi, pomíluj. (3x)

Sláva, i nýňi:

Prízri na mjá i pomíluj mjá, * po sudú ľúbjaščich ímja Tvojé.

Stopý mojá naprávi po slovesí Tvojemú, * i da ne obladájet mnóju vsjákoje bezzakónije.

Izbávi mjá ot klevetý čelovíčeskija, * i sochraňú zápovidi Tvojá.

Licé Tvojé prosvití na rabá Tvojehó, * i naučí mjá opravdánijem Tvojím.

Ischódišča vodnája izvedósťi óči mojí, * ponéže ne sochraních zakóna Tvojehó.

Práveden jesí, Hóspodi, * i právi sudí Tvojí.

Zapovídal jesí právdu sviďínija Tvojá, * i ístinu ziló.

Istájala mjá jésť révnosť Tvojá, * jáko zabýša slovesá Tvojá vrazí mojí.

Razžžéno slóvo Tvojé ziló, * i ráb Tvój vozľubí jé.

Juňíjšij áz jésm i uničižén, * opravdánij Tvojích ne zabých.

Právda Tvojá právda vo vík, * i zakón Tvój ístina.

Skórbi i núždy obritóša mjá, * zápovidi Tvojá poučénije mojé.

Právda sviďínija Tvojá v vík, * vrazumí mjá, i žív búdu.

Vozzvách vsím sérdcem mojím, * uslýši mjá, Hóspodi, opravdánija Tvojá vzyščú.

Vozzvách Tí, spasí mjá, * i sochraňú sviďínija Tvojá.

Predvarích v bezhódiji i vozzvách, * na slovesá Tvojá upovách.

Predvarísťi óči mojí ko útru, * poučítisja slovesém Tvojím.

Hlás mój uslýši, Hóspodi, po mílosti Tvojéj: * po suďbí Tvojéj živí mjá.

Priblížišasja hoňáščiji mjá bezzakónijem, * ot zakóna že Tvojehó udalíšasja.

Blíz jesí Tý, Hóspodi, * i vsí putijé Tvoí ístina.

Ispérva poznách ot sviďínij Tvojích, * jáko v vík osnovál já jesí.

Vížď smirénije mojé i izmí mjá, * jáko zakóna Tvojehó ne zabých.

Sudí súd mój i izbávi mjá, * slovesé rádi Tvojehó živí mjá.

Daléče ot hríšnik spasénije, * jáko opravdánij Tvojích ne vzyskáša.

Ščedróty Tvojá mnóhi, Hóspodi, * po suďbí Tvojéj živí mjá.

Mnózi izhoňáščiji mjá i stužájuščiji mí, * ot sviďínij Tvojích ne ukloníchsja.

Víďich nerazumivájuščija i istájach, * jáko slovés Tvojích ne sochraníša.

Vížď, jáko zápovidi Tvojá vozľubích, * Hóspodi, po mílosti Tvojéj živí mjá.

Načálo slovés Tvojích ístina, * i vo vík vsjá suďbý právdy Tvojejá.

Kňázi pohnáša mjá túne, * i ot slovés Tvojích ubojásja sérdce mojé.

Vozrádujusja áz o slovesích Tvojích, * jáko obritájaj korýsť mnóhu.

Neprávdu voznenavíďich i omerzích, * zakón že Tvój vozľubích.

Sedmeríceju dném chvalích Ťá * o suďbách právdy Tvojejá.

Mír mnóh ľúbjaščym zakón Tvój, * i ňísť ím soblázna.

Čájach spasénija Tvojehó, Hóspodi, * i zápovidi Tvojá vozľubích.

Sochraní dušá mojá sviďínija Tvojá * i vozľubí já ziló.

Sochraních zápovidi Tvojá i sviďínija Tvojá, * jáko vsí putijé mojí pred Tobóju, Hóspodi.

Da priblížitsja molénije mojé pred Ťá, Hóspodi, * po slovesí Tvojemú vrazumí mjá.

Da vnídet prošénije mojé pred Ťá, Hóspodi, * po slovesí Tvojemú izbávi mjá.

Otrýhnut ustňí mojí pínije, * jehdá naučíši mjá opravdánijem Tvojím.

Proviščáet jazýk mój slovesá Tvojá, * jáko vsjá zápovidi Tvojá právda.

Da búdet ruká Tvojá jéže spastí mjá, * jáko zápovidi Tvojá izvólich.

Vozželách spasénije Tvojé, Hóspodi, * i zakón Tvój poučénije mojé jésť.

Živá búdet dušá mojá i voschválit Ťá, * i suďbý Tvojá pomóhut mňí.

Zabludích, jáko ovčá pohíbšeje, vzyščí rabá Tvojehó, * jáko zápovidej Tvojích ne zabých.

Blahoslovén jesí, Hóspodi, naučí mjá opravdánijem tvojím. (Včasi spivu ľude stojať)

Anhelskij sobór udivísja, * zrjá tebé v mértvych vminívšasja, * smértnuju že, Spáse, kríposť razorívša, * i so sobóju Adáma vozdvíhša, * i ot áda vsjá svobódša.

Blahoslovén jesí, Hóspodi, naučí mjá opravdánijem tvojím.

Počtó mýra s mílostivnými slezámi, * o učenícy rastvorjájete? * Blistájajsja vo hróbi ánhel, * Myronósicam viščáše: * vídite vý hrób i urazumíjte: * Spás bo * voskresé ot hróba.

Blahoslovén jesí, Hóspodi, naučí mjá opravdánijem tvojím.

Ziló ráno, * Myronósicy tečáchu * ko hróbu tvojemú, rydájuščyja, * no predstá k ním Ánhel i rečé: * Rydánija vrémja prestá, ne pláčite, * voskresénije že * Apóstolom rcýte.

Blahoslovén jesí, Hóspodi, naučí mjá opravdánijem tvojím.

Myronósicy žený * s mýry prišédšyja * ko hróbu tvojemú, Spáse, rydáchu, * Ánhel že k ním rečé hlahóľa: * Čtó s mértvymi živáho pomyšľájete? * Jáko Bóh bo voskresé ot hróba.

Sláva: Poklonímsja Otcú, * i jehó Sýnovi, i svjatómu Dúchu, * svjaťíj Trójci vo jedíňim suščeství, * so Serafímy zovúšče: * svját, svját, * svját jesí, Hóspodi.

I nýňi: Žiznodávca roždši, * hrichá Ďívo Adáma izbávila jesí, * rádosť že Jévi * v pečáľi mistó podalá jesí: * pádšyja že ot žizni, * k séj naprávi, * iz tebé voplotívyjsja * Bóh i čelovík.

Allilúja, Allilúja, Allilúja, sláva tebí Bóže 3x

(Diákon ilí jeréj hlahólet jekténiju sijú. Ášče mirján molítsja, hlahólet tokmó:

Hóspodi, pomíluj. (3x) Sláva, i nýňi:)

Páki i páki, mírom Hóspodu pomólimsja.

Lík: Hóspodi, pomíluj. (na jedínom kójemždo prošéniji)

Zastupí, spasí, pomíluj, i sochraní nás, Bóže, Tvojéju blahodátiju.

Presvjatúju, prečístuju, preblahoslovénnuju, slávnuju Vladýčicu nášu Bohoródicu i prisnoďívu Maríju, so vsími svjatými pomjanúvše, sámi sebé i drúh drúha, i vés živót náš Christú Bóhu predadím.

Lík: Tebí, Hóspodi.

Jerej: Jáko svjatísja i proslávisja prečestnóje i velikoľípoje ímja tvojé, Otcá i Sýna i svjatáho Dúcha, nýňi i prísno i vo víki vikóv.

Lík: Amíň

I ipakoí, hlás 8: Mironósicy žiznodávca predstojáščyja hróbu, Vladýku iskáchu v mértvych bezsmértnaho, i rádosť blahoviščenija ot ánhela prijémšyja, apóstolom vozviščáchu voskrése Christós Bóh, podajáj mírovi véliju mílosť.

Stepenna hlás 8.

Antifon 1. Ot júnosti mojejá vráh mja is-kušájet, slasťmi palít mja: az že naďíjasja na Ťa Hóspodi, pobíždáju sehó.

Nenavíďaščii Sióna, da búdut úbo préžde istoržéníja jáko travá: ssičét bo Christós výja ich usičénijem muk.

Sláva, i nýňi: Svjatým Dúchom, jéže žíti vsjáčeskim: Svit ot Svíta, Boh velik: so Otcem pojém Jemú, i so Slóvom.

Antifon 2. Vozzvach Tebí Hóspodi, voňmi, prikloní mí úcho tvojé vopijúšču, i očísti préžde dáže ne vózmeši mené otsjúdu.

Na Hóspoda imívyj nadéždu, ne ustrašítsja tohdá, jehdá ohném vsja sudíti ímať i múkoju.

Sláva, i nýňi: Svjatým Dúchom, vsjak kto božéstvennyj vídit, i predhlahólet, čudoďíjstvujet výšňaja, v trijéch jedinaho Bóha poja: ášče bo í trisijájet, jedinonačáľstvujet Božestvó.

Antifon 3. Sérdce mojé strachom Tvoím da pokrýjetsja, smirenomúdrstvujuščeje: da ne voznésšejesja otpadét ot Tebé, Vseščédre.

K máteri svojéj zemlí otchoďáj vsjak páki razrišájetsja prijati múkí, ilí póčesti požívšich.

Sláva, i nýňi: Svjatým Dúchom bohoslóvíje, Jedínica trisvjatája: Otéc bo beznačálen, ot Nehóže rodílsja Syn bezľítno, i Duch soprestólen, soobrážen, ot Otcá sprosijávšij.

Antifon 4. Se nýňi čto dobró, ilí čto krasnó? no jéže žíti brátii vkúpi: v sém bo Hóspoď obiščá živót vičnyj.

O rízi svojéj, íže kríny séľnyja ukrašájaj, poveľívájet, jáko ne podobajet peščísja.

Sláva, i nýňi: Svjatým Dúchom, jedinovídnoju vinóju, vsja soderžátsja miropodáteľňi: Boh bo sej jesť, Otcú že i Sýnovi jedinosúščen Hospódstvenňi.

Diákon: Vónmim.

Jeréj: Mír vsim.

Diákon: Premúdrosť, vónmim.

Prokimen hlás 8. Vocarítsja Hóspoď vo vik, Boh tvoj Sijóne v rod i rod.

Stích: Chvalí dušé mojá Hóspoda, voschvaľu Hóspoda v živoťí mojém.

Jerej: Hóspodu pomolimsja.

Lik: Hóspodi pomiluj.

Jáko svjat jesí, Bóže naš, i v svjatých počiváješi, i tebí slávu vozsylajem, Otcú, i Sýnu, i svjatomu Duchu, nýňi i prísno i v viki vikov.

Amiň.

Vsjákoje dychánie da chvalít Hóspoda.

Vsjákoje dychánie da chvalít Hóspoda.

Stich: Chvalíte Bóha v svjatých jehó, chvalíte jehó v utverždénii síly jehó.

Vsjákoje dychánie da chvalít Hóspoda.

O jéže spodobitisja nam slýšaniju svjatáho jevanhelija, mirom Hóspoda Bóha molim.

Hóspodi pomiluj. 3x

Mír vsím.

I duchovi tvojemú.

Ot Matthéja svjatáho jevanhéllija čténije:

Sláva tebí, Hóspodi, sláva tebí.

Vónmim: V ťim časi jedenadcjať učenikiv poťim pišlo do Galileji na horu, tam, de jim Isus nakazav. Jak joho uviďili, poklonili sja jomu. No dakotry slabo virili. A prišov ku nim Isus i prihovoriv sja jim slovami: „Ja ďistav všytku mic’ na nebesach i na zemľi. Iďte tody, učte všytky narody i kresťte jich v imeňi Otcja i Syna i Svjatoho Ducha. Naučajte jich dotrimovati všytko, što ja vam nakazav. I smoťte, ja z vami čerez všytky dňi, až do kincja svita.“ Amiň.

Sláva tebí, Hóspodi, sláva tebí.

Taže: Voskresenije Chrístóvo víďivše, poklo­nímsja svjatómu Hóspodu Isúsu, jedínomu bezhríšnomu. Krestú tvojemú poklaňájemsja Christé, í svjatoje voskre­senije tvojé pojém i slávim: Ty bo jesí Boh naš, rázvi tebé inóho ne znájem, ímja tvojé imenújem. Priidíte vsi vírniji, poklonimsja svjatomu Christóvu voskreséniju: se bo priíde Krestóm rádosť vsemú míru. Vsehdá bohoslóvjašče Hóspoda, pojém voskresenije Jehó: raspjátije bo preterpív, smertiju smerť razruší.

Psalóm 50.

Pomíluj mja, Bóže, * po velícij mílosti tvojéj. - I po mnóžestvu ščedrót tvojích * očísti bezzakónije mojé. - Najpáče omýj mja ot bezzakónija mojehó, * i ot hrichá mojehó očísti mja. - Jáko bezzakónije mojé az znáju, * i hrich moj predomnóju jesť výnu. - Tebí jedínomu sohriších i lukávoje pred tobóju sotvorích, * jáko da opravdíšisja vo slovesích tvojích, i pobidíši vnehdá sudíti ti. - Se bo v bezzakónijich začát jesm, * i vo hrisích rodí mja máti mojá. - Se bo ístinu vozľubíl jesí: * bezvístnaja i tájnaja premúdrosti tvojejá javíl mi jesí. - Okropíši mja yssópom i očíščusja, * omýješi mja, i páče sňíha obíľusja. - Slúchu mojemú dási rádosť i vesélije, * vozrádujutsja kósti smirénnyja. - Otvratí licé tvojé ot hrich mojích: * i vsja bezzakónija mojá očísti. - Sérdce čísto sozíždi vo mňi, Bóže, * i duch prav obnoví vo utróbi mojéj. - Ne otvérži mené ot licá tvojehó, * i Dúcha tvojehó svjatáho ne ottimí ot mené. - Vozdážď mi rádosť spasénija tvojehó, * i Dúchom vladýčnym utverdí mja. - Naučú bezzakónnyja putém tvojím, * i nečestíviji k tebí obraťátsja. - Izbávi mja ot krovéj, Bóže, Bóže, spasénija mojehó: * vozrádujetsja jazýk moj právďi tvojéj. - Hóspodi ustňí mojí otvérzeši,* i ustá mojá vozvisťát chválu tvojú. - Jáko ašče by voschoťíl jesí žértvy dal bych úbo, * vsesožžénija ne blahovolíši. - Žértva Bóhu duch sokrušén: * sérdca sokrušénna i smirénna Boh ne uničižít. - Ublaží, Hóspodi, blahovolénijem tvojím Sijóna, * i da soziždutsja sťíny Jerusalímskija. Tohdá blahovolíši žértvu právdy, voznošénije i vsesožžehajémaja, * tohdá vozložát na oltár tvoj telcý.

Sláva, hlás 6. Molítvami svjatých apóstol, Mílostive, očísti mnóžestvo sohrišénij nášych.

I nýňi: Mólitv rádi Prečístyja Bohoródicy, Mílostive, očísti mnóžestvo sohrišénij nášych

Stich: Pomíluj mja, Bóže, po velícij mílosti tvojéj. I po mnóžestvu ščedrót tvojích očísti bezzakónije mojé.

Stichira, hlás 6. Voskrés Isús ot hróba jákože prorečé, dadé nám žývot víčnyj i véliju mílosť.

Jerej: Spasí, Bóže, ľúdi tvojá, i blahosloví dostojánije tvojé, posití mír tvoj mílostiju i ščedrótami, vozvýsi róh christiján pravoslávnych, i nizposlí na ný mílosti tvojá bohátyja, molítvami prečístyja Vladýčicy nášeja Bohoródicy i prisnoďívy Maríji; síloju čestnáho i životvorjáščaho Krestá, zastuplénmi nebésnych Síl bezplótnych, čestnáho i slávnaho proróka, predtéči i krestíteľa Joánna, svjatých slávnych i vsechváľnych Apóstol, i íže vo svjatých Otéc nášich i vseléňskich velíkich učítelej i svjatítelej: Vasílija Velíkaho, Hrihórija Bohoslóva i Joánna Zlatoústaho, Atanásija i Kyrílla, i íže vo svjatých otcá nášeho Nikolája Mýr Lykíjskich čudotvórca, svjatých slavjáňskich Apóstol Kyrílla i Metódija, i svjatáho svjaščenomúčenika Josafáta, svjatých, slávnych i dobropobídnych Múčenik, prepodóbnych i bohonósnych otéc nášich, svjatých i právednych Bohootéc Joakíma i Ánny i prepodobných i bohonósnych otéc nášich Antónija i Teodósija Pečérskich, i svjatáho (jehóže jésť deň ilí chrám), i vsích Svjatých tvojích: mólim Ťa mnohomílostive Hóspodi, uslýši nás hríšnych moľáščichtisja, i pomíluj nás.

Ľ.: Hóspodi pomíluj 12x

Vozhlas: Milostiju i ščedrótami i čelovikoľúbiijem jedinoródnaho Sýna tvojehó s nímže blaholslovén jesí so presvjatým i blahím i životvorjáščym tvojím Dúchom nýňi i prísno i vo víki vikóv.

Ľ.: Amíň.

[Kanón voskrésen], hlás 8.

Písň 1.

irmós: Kolesnicehoníteľa faraóňa pohruzí, čudotvorjáj inohdá moiséjskij žézl, krestoobrázno porazív, i razďilív móre, Izráiľa že bihlecá, pišechódca spasé, písň Bóhovi vospivájušča.

Vsesíľnu Christóvu božestvú káko ne divímsja? Ot strastéj úbo vsím vírnym bezstrástije i netľínije točášču, ot rebrá že svjatáho istóčnik bezsmértija iskápajušču, i živót iz hróba prisnosúščnyj.

Jáko blahoľípen ženám ánhel nýňi javísja, i svítlyja nosjá jestéstvennyja óbrazy neveščéstvennyja čistotý, zrákom že vozviščája svít voskresénija, zovýj: voskrése Hospóď.

Bohoródičen: Preslávnaja vozhlahólašasja o tebí v róďich rodóv, Bóha Slóva vo črévi vmíščšaja, čistá že prebývši Bohoródice Maríje. Ťímže ťá vsí počitájem, súščeje po Bózi predstáteľstvo náše.

[Kanón Krestovoskrésen].

_irmó_s: Vódu prošéd jáko súšu, i jehípetskaho zlá izbižáv, Izráiľťanin vopijáše: izbáviteľu i Bóhu nášemu pojím.

Vzjášasja vratá boľíznennaja, i užasóšasja vrátnicy ádovy, zrjášče v preispódňijšaja sošédšaho, íže na vysoťí vsích prevýše jestestvá.

Udivíšasja číni ánheľstiji, zrjášče na prestóľi posaždéno Ótči pádšeje jestestvó čelovíčeskoje, zatvorénnoje v preispódnich zemlí.

Ín kanón [presvjaťíj Bohoródici].

irmós: Pojím Hóspodevi, provédšemu ľúdi svojá skvozí čermnóje móre, jáko jedín slávno proslávisja.

Prečístaja Bohoródice, voplóščšejesja prisnosúščnoje i prebožéstvennoje Slóvo páče jestestvá róždšaja, pojém ťá.

Hrózd ťá živonósen, vsemírnaho iskápajušč sládosť spasénija, Ďíva Christé rodí.

[Kanón vsém svjatým]. Hlás 8. Jehóže kraestróčije: Svjatých vsích mnohoiménnyja číny pojú.

_irmó_s: Kolesnicehoníteľa faraóňa pohruzí čudotvorjáj inohdá moiséjskij žézl, krestoobrázno porazív i razďilív móre: Izráiľa že bihlecá, pišechódca spasé, písň Bóhovi vospivájušča.

Tvojích svjatých vospivája číny, tvojím svítom duší mojéj molítvami sích ozarítisja moľúsja: tý bo jesí svít nepristúpnyj, nevíďinija mrák othoňá, tvojími svitlosťmí, Slóve Bóžij svitodávče Christé. [Dváždy.]

Jáko vozvýsilsja jesí na drévi, privlékl jesí k tvojemú poznániju jazýkov vsé nasľídije Vladýko, i svítom ujasníl jesí svjatýja Tróicy, apóstoly svjatými tvojími, ímiže mhlú prélesti othnál jesí.

Zakonopoložénijem tvojím Christé, uviščavájemi tvojí apóstoli, jáže na zemlí vsjá blahočéstno otrínuša, i svítom blahodáti osvitíša vsjú vselénnuju slávniji, Jevánheľski ťá propovídajušče.

Sláva: Rádujuščesja múčenicy, krest tvój vzémše, i čestnúju strásť neuklónno podražájušče, mučíteľskaho ne ubojášasja preščénija dóbliji, ni ohňá, ni mečá, ni rán, no nižé hláda, nižé smérti.

I nýňi, Bohoródičen: Namírenije múžeskoje Ďívy, vsečístaja vosprijémše jávi: múčeničeskaja bo stradánija neuklónno podražájušče, i psalómski v sľíd tebé, Sýnu tvojemú Ďívo, božéstvenňi srádujuščesja, vsecarjú privedóšasja.

Katavásija: Irmos: Hl.4. Otvérzu ustá mojá, i napólňatsja dúcha, i slóvo otrýhnu Caríci Máteri, i javľúsja svítlo toržestvúja, i vospojú rádujasja tojá čudesá.

Písň 3.

irmós: Utverždéj v načáľi nebesá rázumom, i zémľu na vodách osnovávyj, na kámeni mjá Christé, zápovidej tvojích utverdí, jáko ňísť svját, páče tebé jedíne čelovikoľúbče.

Osuždénna bývša Adáma vkušénijem hrichá, plóti tvojejá spasíteľnoju strástiju opravdál jesí Christé: sám bo nepovínen smértnaho iskúsa býl jesí bezhríšne.

Voskresénija svít vozsijá súščym vo tmí, i síni smértňij siďáščym, Bóh mój Iisús, i svojím božestvóm krípkaho svjazáv, sehó sosúdy raschítil jésť.

Bohoródičen: Cheruvím i serafím prevýšši javílasja jesí Bohoródice: tý bo jedína prijála jesí nevmistímaho Bóha, v tvojém črévi neskvérnaja. Ťímže ťá vírniji vsí písňmi čístaja ublažájem.

_In irmó_s: Nebésnaho krúha verchotvórče, Hóspodi, i cérkve ziždíteľu, tý mené utverdí v ľubví tvojéj, želánij kráju, vírnych utverždénije, jedíne čelovikoľúbče.:

Otvérhšahosja préžde zápovidi Hóspodi, izrinovénna mjá súšča ot tebé sotvoríl jesí, v nehóže voobrazívsja, poslušániju že navýk, sebé páki nazdál jesí raspjátijem.

Premúdrostiju vsjá prouvíďivyj Hóspodi, i rázumom tvojím vodruzívyj preispódňaja, ne ne spodóbil jesí snizchoždénijem tvojím Slóve Bóžij, voskresíti jéže po óbrazu tvojemú.

Ín. irmós: Tý jesí utverždénije pritekájuščich k tebí, Hóspodi: tý jesí svít omračénnych, i pojét ťá dúch mój.

Dážď nám pómošč tvojími molítvami vsečístaja, prilóhi otražájušči ľútych obstojánij.

Jévi pramáteri tý ispravlénije bylá jesí, načáľnika žízni mírovi Christá Bohoródice róždši.

Ín. irmós: Utverždéj v načáľi nebesá rázumom, i zémľu na vodách osnovávyj, na kámeni mjá, Christé, zápovidej tvojích utverdí. Jáko ňísť svját, páče tebé, jedíne čelovikoľúbče.

Svjaščénstvom svjaščénnym svjaščénnicy i pástyrije oblékšesja, i tó múdrstvenno okormívše Christú, dostójno ukrasíša učíteľstva slóvo, svýše voístinnu obohatívšesja. [Dváždy.]

Ukrasívšesja udobréňmi pérvaho dobrotvorénija, i javívšesja jáko nepreléstnaja svitíla, onebesíste cérkov, Christóvu svjatíji, otínudu ináho tú razlíčno ukrasívše. [Dváždy.]

Sláva: Zakónu povinújuščesja tvojemú blažénnych sobóri, mnohoobráznymi dobroďíteľmi prosvitívšesja: nasľídovaša obíteli nebésnyja Vladýko, rádujuščesja: ínuju bo ínyj, vsí týja dostójno ispólniša.

Bohoródičen: Ot čréva ďívstvenna, íže ot Bóha Bóha Slóva rodilá jesí nám Bohomáti, jehóže Ďívy čístyja Bohoľípno vozľubíša, i v sľíd tebé vsjá semú jávi posľídovaša.

Irmos: Tvojá pisnoslóvcy, Bohoródice, živýj i nezavístnyj istóčniče, lík sebí sovokúpľšyja duchóvno utverdí, v božéstvenňij tvojéj slávi vincév slávy spodóbi.

Po 3. Pisňi:

(Diákon ilí jeréj hlahólet jekténiju sijú. Ášče mirján molítsja, hlahólet tokmó:

Hóspodi, pomíluj. (3x) Sláva, i nýňi:)

Páki i páki, mírom Hóspodu pomólimsja.

Lík: Hóspodi, pomíluj. (na jedínom kójemždo prošéniji)

Zastupí, spasí, pomíluj, i sochraní nás, Bóže, Tvojéju blahodátiju.

Presvjatúju, prečístuju, preblahoslovénnuju, slávnuju Vladýčicu nášu Bohoródicu i prisnoďívu Maríju, so vsími svjatými pomjanúvše, sámi sebé i drúh drúha, i vés živót náš Christú Bóhu predadím.

Lík: Tebí, Hóspodi.

Jerej: Jako Ty jesi Boh naš, i Tebí slávu vozsylájem Otcú i Sýnu i svjatómu Dúchu, nýňi i prísno i vo víki vikóv.

Lík: Amíň.

Sidálen, hlás 8. Podóben: Premúdrosti slóva: Práotec, otéc, patrijárch, apóstol, múčenik, prorók, svjatítelej, i prepodóbnych tvojích, póstnikov i právednych že, i vsjákaho ímene písannaho v knízi žízni, svjatúju pámjať soveršájušče Christé Bóže, vsích podvizájem na molítvu, moľáščesja: umirí mír tvój ťími jáko čelovikoľúbec, da vsí vopijém tí: Bóže proslavľájemyj v sovíťi svjatých tvojích, tý jesí voístinnu proslávivyj dostójno pámjať ích.

Sláva: tójže. Práotec, otéc, patrijárch, apóstol, múčenik, prorók, svjatítelej, i prepodóbnych tvojích, póstnikov i právednych že, i vsjákaho ímene písannaho v knízi žízni, svjatúju pámjať soveršájušče Christé Bóže, vsích podvizájem na molítvu, moľáščesja: umirí mír tvój ťími jáko čelovikoľúbec, da vsí vopijém tí: Bóže proslavľájemyj v sovíťi svjatých tvojích, tý jesí voístinnu proslávivyj dostójno pámjať ích.

I nýňi: Bohoródičen: Nebésnuju dvér i kivót, presvjatúju hóru, svítlyj óblak vospojím, neopalímuju kupinú, slovésnyj ráj, Jévy vozzvánije, vselénnyja vsejá velíkoje sokróvišče, jáko spasénije v néj soďílasja mírovi, i ostavlénije drévnich sohrišénij. Sehó rádi vopijém jéj: molísja Sýnu tvojemú, prehrišénij ostavlénije darováti, blahočéstno poklaňájuščymsja vsesvjatómu roždéstvú tvojemú.

Písň 4.

irmós: Tý mojá kríposť Hóspodi, tý mojá i síla, tý mój Bóh, tý mojé rádovanije, ne ostávľ ňídra Ótča, i nášu niščetú positív. Ťím s prorókom Avvakúmom zovú ti: síľi tvojéj sláva čelovikoľúbče.

Tý vrahá súšča mjá ziló vozľubíl jesí, tý istoščánijem stránnym sošél jesí na zémľu, blahoutróbne Spáse, posľídňaho mojehó dosaždénija ne otvérhsja, i prebýv na vysoťí prečístyja tvojejá slávy, préžde bezčéstvovannaho proslávil jesí.

Któ zrjá Vladýko, nýňi ne užasájetsja, strástiju smérť razrušájemu, krestóm bižáščeje tľínije, i smértiju ád bohátstva istoščavájemyj, božéstvennoju síloju tebé raspjátaho? Čúdno ďílo čelovikoľúbče.

Bohoródičen: Tý vírnych pochvalá jesí beznevístnaja, tý predstáteľnice, tý i pribížišče christiján, sťiná i pristánišče: k Sýnu bo tvojemú moľbý nósiši vseneporóčnaja, i spasáješi ot bíd, víroju i ľubóviju Bohoródicu čístuju tebé znájuščija.

In Irmós: Uslýšach Hóspodi slúch tvój, i ubojáchsja, razumích smotrénije tvojé, i proslávich ťá, jedíne čelovikoľúbče.

Na kresťí ťa prihvozdíša zakonoprestúpnych ďíti, Christé Bóže: ímže spásl jesí jáko blahoutróben, slávjaščyja tvojá stradánija.

Voskrés ot hróba, vsjá sovoskresíl jesí súščyja vo áďi mértvyja, i prosvitíl jesí jáko blahoutróben, slávjaščyja tvojé voskresénije.

irmós tójže.

Klás vozrastívšaja životvórnyj, neoránnaja nívo, podajúščaho mírovi žízň, Bohoródice spasáj pojúščyja ťá.

Bohoródicu ťá vsečístaja, prosvíščšijisja vsí propovídujem, sólnce bo právdy rodilá jesí, prisnoďívo.

Ín. irmós: Tý mojá kríposť Hóspodi:

Sovokúpľsja sobór svjatých tvojích ľubóviju, i tebé naslaždájajsja, ístinno že i čísto v rádosti, lík nerazrušájemyj ánhelom slikújet, o tebí vsevídče, Bózi vsích i Hóspoďi. [Dváždy.]

Júnošeski slávniji svjaščennomúčenicy, múčeničeskim vincém uvjazóstesja, Bohoďíteľnym pomázanijem, jéže pérvije svjaščénstva ukrášeni prebohátiji. Ťímže suhúby vincý dostójno prijémše, so Christóm víčno rádujetesja.

Plotskóe mudrovánije vsé Dúchu Bohonósniji voístinnu povinúste, póstničeski sehó stremlénija neuderžímaja, postóm uvjadívše: i nýňi bezstrástija svítom prosvitívšesja, mzdý trudóv prijáste.

Sláva: Jáko Christá múčenicy pervomúčenika, múki ziló preterpíste, terpilívo že i dóblestvenňi, jáko v čuždích stradáľčestvujušče ťilesích slávniji, i nýňi cárstvija nasľídnicy pokazávšesja, vírnym iscilénija istočájete.

I nýňi, Bohoródičen: Nevísta Bóžija bylá jesí Bohorodíteľnice, sehó bo Slóvo prevíčnoje, ťilésňi rodilá jesí nám: v némže i žený svjáto požívše, i stradáľčestvy vserazlíčnymi tobóju ukrasívšesja, pramáterneje padénije ispráviša.

Písň 5.

irmós: Vskúju mjá otrínul jesí ot licá tvojehó svíte nezachodímyj, i pokrýla mjá jésť čuždája tmá okajánnaho? No obratí mja, i k svítu zápovidej tvojích putí mojá naprávi, moľúsja.

Oďíjatisja preterpíl jesí v bahrjanícu, préžde strásti tvojejá Spáse, poruhájem, pervozdánnaho pokryvája bezobráznoje obnažénije, i náh prihvozdílsja jesí na kresťí plótiju, sovlačája Christé rízu umerščvlénija.

Ot pérsti smértnyja, tý pádšeje mojé páki nazdál jesí suščestvó voskrés, i nestaríjuščejesja Christé ustrójil jesí, javív páki jákože cárskij óbraz, netľínija žízň blistájušč.

Bohoródičen: Máterneje derznovénije, jéže k Sýnu tvojemú imúšči vsečístaja, sródnaho promyšlénija jéže o nás ne prézri, mólimsja, jáko tebé i jedínu christijáne ko Vladýce, očiščénije mílostivno predlahájem.

In Irmos: Prosvití nás poveľíniji tvojími Hóspodi, i mýšceju tvojéju vysókoju, tvój mír podážď nám čelovikoľúbče.

Nastávi nás síloju krestá tvojehó Christé: ťím bo tebé pripádajem, mír podážď nám čelovikoľúbče.

Okormí živót náš, jáko preblahíj, pojúščich tvojé vostánije, i mír podážď nám čelovikoľúbče.

In Irmos: Utreňujušče vopijém tí, Hóspodi spasí ný: tý bo jesí Bóh náš, rázvi tebé inóho ne vímy.

Utolí nesterpímuju búrju strastéj mojích, jáže Bóha róždšaja, okormíteľa i Hóspoda.

Slúžat roždestvú tvojemú prečístaja Bohoródice, ánheľstiji čínove i čelovíkov sobránije.

Ín. irmós: Vskúju má otrínul jesí:

Predzríti, jákože prorócy božéstvenniji, choťáščaja býti spodóbistesja, i vozžeľíste blahoródiju duší očístitisja žitijém čístym, o Bohonósniji, prosviščájemi síloju duchóvnoju. [Dváždy.]

Lík svjatých nýňi svítitsja božéstvennymi darováňmi, íže préžde zakóna vsí patrijársi, prorócy, apóstoli, i múčenik sobóri, i póstnikov, i učítelej, i právednych, so svjaščennomúčeniki. [Dváždy.]

Sláva: Sviťáščejesja zrjášče tvojích svjatých dnés sobránije, tvojéju Spáse svítlostiju, i sviščámi neuhasájemymi blahodáti, tvojé božéstvennoje bohátstvo blahích i izobílije vospiváem neprestánno čelovikoľúbče

Bohoródičen: Predívnoje tvojé roždéstvó vozľubívše žený prečestnýja, krásnaja žitijá nivočtóže vminíša vsečístaja, jehó jedíni račíteľno želájušče svítlosti i božéstvennaho osijánija.

Písň 6.

irmós: Očísti mjá Spáse, mnóha bo bezzakónija mojá, i iz hlubiný zól vozvedí, moľúsja: k tebí bo vozopích, i uslýši mjá Bóže spasénija mojehó.

Drévom krípko nizloží mja načalozlóbnyj: tý že Christé, voznéssja na kresťí, kripčáje nizložíl jesí, posramív sehó, pádšaho že voskresíl jesí.

Tý uščédril jesí Sijóna, vozsijávyj ot hróba, nóvaho vmísto vétchaho soveršív, jáko blahoutróben, božéstvennoju tvojéju króviju: i nýňi cárstvuješi v ném vo víki Christé.

Bohoródičen: Da izbávimsja ot ľútych prehrešénij moľbámi tvojími Bohorodíteľnice čístaja, i da ulučím prečístaja, božéstvennoje sijánije, iz tebé neizrečénno voploščénnaho Sýna Bóžija.

In Irmos: Molítvu prolíju ko Hóspodu, i tomú vozviščú pečáli mojá, jáko zól dušá mojá ispólnisja, i živót mój ádu priblížisja, i moľúsja jáko Jóna: ot tlí Bóže vozvedí mjá.

Dláni na kresťí rasprostérl jesí, isciľájaj neuderžánno prostértuju vo Jedémi rúku pervozdánnaho, i tvojéju vóleju žélči vkusíl, i spásl jesí Christé, jáko sílen, slávjaščyja tvojá stradánija.

Smérti izbáviteľ vkusí drévňaho osuždénija, jáko da i tľínija cárstvo razrušít: i vo ádskaja sšéd voskresí, i spasé jáko sílen pojúščyja jehó voskresénije.

In Irmos: Rízu mňí podážď svítlu, oďíjajsja svítom jáko rízoju, mnohomílostive Christé Bóže náš.

Chrám ťá Bóžij i kivót, i čertóh oduševlénnyj, i dvér nebésnuju, Bohoródice, vírniji vozviščájem.

Trébiščem razrušíteľ, jáko Bóh, bývšeje roždéstvó tvojé Maríje Bohonevísto, poklaňáemo jésť so Otcém i Dúchom.

Ín. irmós: Očísti mjá Spáse:

Jáko čestnýj izbránnyj, položénnyj kámeň krajeuhólnyj, svjatíji v Sijóňi obrítše ťá Vladýko, osnovánije nepokolebímoje, izbránnoje kámenije sebí nazdáša. [Dváždy.]

Pronzénnym tvojím rébrom, kápli króve iskápaša, s vodóju Bohoďíteľno, mír obnovíša, i božéstvennyj sobór svjatých vsích blahoďíteľu prizdáša. [Dváždy.]

Sláva: Pojém vseblahočéstno múčenik óblak božéstvennyj, blahodátiju prosviščénnyj, i vozsijávšij svitľíje bahrjaníceju króve, i červleníceju ích tvérdaho stradánija.

Bohoródičen: Máter vseístinnuju Bóžiju ťá vsí znájem, jéjuže jestestvó žénskoje izbávľšejesja, vseneporóčnaja, o Chrisťí predpostradá, dobroďíteli že vsjákija blahočéstno býsť ispólneno.

Po 6. pisňi

(Diákon ilí jeréj hlahólet jekténiju sijú. Ášče mirján molítsja, hlahólet tokmó:

Hóspodi, pomíluj. (3x) Sláva, i nýňi:)

Páki i páki, mírom Hóspodu pomólimsja.

Lík: Hóspodi, pomíluj. (na jedínom kójemždo prošéniji)

Zastupí, spasí, pomíluj, i sochraní nás, Bóže, Tvojéju blahodátiju.

Presvjatúju, prečístuju, preblahoslovénnuju, slávnuju Vladýčicu nášu Bohoródicu i prisnoďívu Maríju, so vsími svjatými pomjanúvše, sámi sebé i drúh drúha, i vés živót náš Christú Bóhu predadím.

Lík: Tebí, Hóspodi.

Jerej: Jáko tý jesí cár míra, i Spás dušám nášym, i Tebí slávu vozsylájem Otcú i Sýnu i svjatómu Dúchu, nýňi i prísno i vo víki vikóv.

Lík: Amíň.

Kondák, hlás 8: Jáko načátki jestestvá, nasadíteľu tvári, vselénnaja prinósit tí Hóspodi Bohonósnyja múčeniki. Ťích molítvami v míri hlubóci cérkov tvojú, žíteľstvo tvojé, Bohoródiceju sobľudí mnohomílostive.

íkos: Íže po vséj zemlí múčivšijisja, i na nebesá preselívšijisja, íže strásti Christóvy podražávšiji, i strásti náša otjémľuščiji, zďí dnés sobirájutsja, pervoroždénnych pokazújušče cérkov, jáko hórnija óbraz soderžášču, i Christú vopijúšču: Bóh mój jesí tý, Bohoródiceju sobľudí mja, mnohomílostive.

I čtém próloh.

Sinaksár v neďíľu vsích svjátých.

Stichí: Hóspoda mojehó vsjá pojú drúhi:

Ášče že któ choťá ko vsím da ídet.

V tójže déň v neďíľu po pjatdesjátnici, íže povsjúdu vselénnyja, vo Asíi, Livíi i Jevrópiji, sívere že i júze, svjatých vsích prázdnik prázdnujem: jehóže úbo po vsesvjátáho Dúcha sošéstviji Božéstvenniji otcý náši uzakóniša soveršáti, áki by óbraz ňíkij pokazújušče, jáko vsesvjátáho Dúcha prišéstvije, sicevája apóstoly ďíjstvova, osvjatívšeje i upremúdrivšeje íže ot nášeho smišénija, v napolnénije otpádšaho ónaho čína ánheľskaho, sích ustávivšeje, i Bóhu Christóm privédšeje. óvich úbo mučénijem i króviju, óvich že dobroďíteľnym žitijém i prebyvánijem, i jáže páče jestestvá soďílovajet. Schódit úbo Dúch svjatýj v víďi ohňá, jestestvóm hórňijšeje imijaj preložénije: voschódit že k hórnim pérsť, jestestvóm dólu prelóžna súšči, i náše smišénije, préžde vmáľi úbo prijátaja, i obožénnaja Bohom slóvom plóť, voznesénnaja, i odesnúju Ótči slávy sédšaja. Nýňi že i vsích vlečét choťáščich, jáko obitovánije, jákože Bóhu Slóvu pokazújušču primirénija ďilá, i ňíkij namírennyj konéc, jéže k nám plótiju prišéstvija jehó i smotrénija, jákože drévle otrinovénnyja v sojedinénije i drúžestvo privódit Bóžije, neznájuščija ot jazýk ľúdi, čelovíčeskaho jestestvá áki ňíkija načátki prinosjáščaho Bóhu, íže v ném razlíčno blahoiskusívšichsja. Po jedínomu úbo óbrazu, síce vsích svjátých prázdnujem prázdnik: po vtorómu že, ponéže mnózi úbo Bóhu blahouhodíša dobroďíteli rádi krájnija, i inoobrázno bezimenítiji ot čelovík býša: ilí i za ňíkaja néhli čelovíčeskaja, mnóhu že obáče slávu ot Bóha imúšče. Ilí jáko mnózi úbo po Chrisťí žítelstvovaša vo indíi, i jehípte, i aravíi, meždoréčiji že i frihíi, i íže výše jevksína mórja: ješčé že i vo vsém zápaďi, dáže i do samích vretaníjskich ostrovóv, i prósto reščí, v vostóci i zápaďi. Ne bjáše že podóbno sích vsích jákože podobájet počestí, rádi bezčísľstva, jákože cerkóvnyj priját obýčaj: da úbo jéže ot óňich vsích pómošč priímem, iďíže któ na zemlí Bóhu blahouhodí. Ináko že: i búduščich rádi, néhli svjátých vsích prázdnik božéstvenniji otcý prázdnovati uzakóniša: vsích že, íže préžde i pósľižde, javlénnych že i nejavlénnych, vo jelícich Dúch svjatýj vselívyjsja osvjatí, počitájušče i svosprijémľušče. Ilí i trétije, podobáše po části na kíjždo déň prázdnujemyja svjatýja, i vo jedín sobráti déň da javítsja, jáko o jedínom Chrisťí podvizášasja, i vsí tóžde dobroďíteli tekóša póprišče. I táko vsí jáko jedínaho Bóha rabí dostójno vinčáni býša, cérkov síi sostáviša, hórnij mír voznapolňájušče, pooščrjájušče že i nás rávnyj pódvih sím tvoríti, razlíčen súšč i mnohovíden, k po jelíku že kóždo ímať síly, vsím usérdijem tščátisja. Sím úbo, íže ot víka svjatým vsím, Lév prisnopámjatnyj i premúdryj cár chrám prevélij i predóbryj sozdá, blízu že jésť séj svjatých apóstol chráma vnútr Konstantíňa hráda: préžde úbo, jákože hlahóľut, Feofáňi žeňí jehó pérvije sehó sozidájaj, uhodívšej Bóhu v konéc. I jéže preslávnoje posreďí mólv i cárstvij vnútr: i ponéže priobščí namírenije svojé cérkvi, ne obríte jejá pokorénnyja vóli svojéj, nižé voschoťí mudrovánija jehó, hlahóľušči: jáko ne ľípo jésť ónu, jáže včerá nedávno rastľivášesja cárskim mečtánijem, i píščeju, vnezápu počitáti tolíko, jákože sozidáti jéj sicevýj chrám velikoľípnyj, i izrjádnyj, i nižé vrémja dajáše jé, ášče i blahouhodí Bóhu. Tohdá premúdrijšij cár sobórnym choťínijem vsejá cérkve, velíkij chrám, íže sozdá, posvjatí vsím svjatým vselénnyja, hlahóľa: ášče i Feofána jésť svjatá, da sopričtétsja so vsími svjatými. I sehó rádi áz mňú, jáko otséľi priját načálo prázdnovatisja séj prázdnik, vnehdá bjáše i préžde. Sehó rádi položíša í posľidí vsích prázdnikov, ókrest vsjá prázdniki ľíta sosťahájaj, i zakľučájaj áki ohraždénijem. Zané cerkóvnoje ustavlénije i blahočínije, ášče i préžde mnóhaho načásja, i pomáľi prichoždáše v dóbroje ustavlénije, jákože podobáše: no vo dní sehó carjá ustáviša v soveršénnoje, i izobrazíša čínom, íže dnés jésť. Trióď úbo, vkrátci reščí, obderžít vnútr s velíkim priľižánijem, jelíka Bóh sotvorí nás rádi neizrečénnymi slovesý. Padénije dijávole s nebésé, pérvoju prítčeju izhnánije Adámovo, i prestuplénije: jéže nás rádi Bóha Slóva smotrénije vsé, i káko na nebesá svjatým Dúchom páki vzydóchom, i ispádšij ónyj čín ispólnichom, jéže svjatými vsími poznavájetsja. Vídomo že búdi, jáko vsjá nýňi prázdnujem, jelíka blahodátno osvjatí Dúch svjatýj: hlahóľu úbo vysočájšija i osvjaščáteľnyja umý, devjatí jávi činóv: Práotcy i patrijárchi, proróki i svjaščénnyja apóstoly, múčeniki i svjaščennonačáľniki, svjaščennomúčeniki i prepodóbnomúčeniki, prepodóbnyja i právednyja, i vsjá svjatých žén likovánija, i inýja vsjá bezimenítyja svjatýja, s nímiže da búdut i choťáščiji býti. Préžde že vsích, i vo vsích, i so vsími, svjátých svjatúju, presvjatúju, i ťích prebezsravníteľno lúčšuju ánheľskich činóv, Hospožú nášu i Vladýčicu, Bohoródicu Maríju prisnoďívu: jejáže molítvami Christé Bóže, i vsích ot víka svjatých tvojích, pomíluj i spasí nás, jáko jedín bláh i čelovikoľúbec.

Písň 7.

irmós: Bóžija snizchoždénija óhň ustyďísja v Vavilóňi inohdá. Sehó rádi ótrocy v peščí, rádovannoju nohóju jáko vo cvítnici likújušče, pojáchu: blahoslovén jesí Bóže otéc nášich.

Slávnoje istoščánije, božéstvennoje bohátstvo tvojejá niščetý Christé, udivľájet ánhely, na kresťí zrjáščyja ťá prihvoždájema, za jéže spastí víroju zovúščyja: blahoslovén Bóh otéc nášich.

Božéstvennym tvojím sošéstvijem svíta ispólnil jesí preispódňaja, i tmá prohnána býsť préžde hoňáščaja: otonúduže voskresóša íže ot víka júznicy, zovúšče: blahoslovén Bóh otéc nášich.

Tróičen. Vsích úbo Hóspoda, jedínaho že jedínomu jedinoródnomu Sýnu pravoslávno Otcá bohoslóvjašče, ťá vozviščájem, i jedínaho víďašče ot tebé ischoďášča Dúcha právaho, sojestéstvenna i soprisnosúščna.

In Irmos: Ot Judéji došédše ótrocy, vo Vavilóňi inohdá, víroju trójčeskoju plámeň péščnyj popráša pojúšče: otcév Bóže blahoslovén jesí.

Spasénije soďílal jesí posreďí vselénnyja, proróčeski Bóže: na drévo bo voznesén býv, vsjá prizvál jesí víroju zovúščyja: otéc nášich Bóže blahoslovén jesí.

Voskrés ot hróba jákože ot sná ščédre, vsích izbávil jesí ot tlí, tvár že uverjájetsja apóstoly propovídajuščimi vostánije: otcév Bóže blahoslovén jesí.

irmós tójže.

Ot ďívstvennaho ložesná voplóščsja, javílsja jesí na spasénije náše. Ťímže tvojú Máter víďašče Bohoródicu, blahodárstvenno zovém: otcév Bóže blahoslovén jesí.

Žézl prorastíla jesí Ďívo ot kórene Jesséova, vseblažénnaja, plód cvitonosjáščij spasíteľnyj, víroju Sýnu tvojemú zovúščym: otcév Bóže blahoslovén jesí.

Ín. irmós: Bóžija snischoždénija:

Svjatých čínove, vo svjatých počivájuščaho nemólčno pojúšče, sládosti božéstvennyja nýňi naslaždájutsja, i rádujuščesja likújut pojúšče: blahoslovén Bóh otéc nášich.

Božéstvennymi sijáňmi trisólnečnaho svitoprolítija, čéstňi svjatých sobóri osijávšesja, jedínicu tričíslennuju bohoslóvjat, Otcá beznačáľna, i Sýna blahočéstno, i Dúcha svjatáho.

Neizrečénnoju slávoju tvojéju, jehdá javíšisja Bóže posreďí bohóv, dostójnaja podajá, i dáry razdajá, i vincý dajá, tohdá Spáse spodóbi píti tebé: blahoslovén Bóh otéc nášich.

Sláva: Rádujuščesja pojím svjatých vsích sobór, otvsjúdu sobrávšichsja, i ródy vkúpi i dostójinstva, i žíteľstva i s ními pojém: blahoslovén Bóh otéc nášich.

I nýňi: Bohoródičen: Maríju prečístuju, i presvjatúju Bohorodíteľnicu, otrokovícy vsjá, lík božéstvennyj kúpno sostávivše, velehlásno rádujuščesja vozopíjte: rádujsja, rádosti istóčnik nám istočájuščaja.

Písň 8.

irmós: Sedmeríceju péšč chaldéjskij mučíteľ Bohočestívym neístovno razžžé: síloju že lúčšeju spasény sijá víďiv, tvorcú i izbáviteľu vopijáše: ótrocy blahoslovíte, svjaščénnicy vospójte, ľúdije prevoznosíte vo vsjá víki.

Iisúsova božestvá prebožéstvennaja síla v nás Bohoľípno vozsijála jésť: plótiju bo vkúš za vsích smérť kréstnuju, razruší ádovu kríposť. Jehóže neprestánno ótrocy blahoslovíte, svjaščénnicy vospójte, ľúdije prevoznosíte vo vsjá víki.

Raspnýjsja vostá, velikovýjnyj padé, padýj i sokrušénnyj isprávisja, tľá otvéržena býsť i netľínije procvité: žízniju bo mértvennoje požérto býsť. ótrocy blahoslovíte, svjaščénnicy vospójte, ľúdije prevoznosíte vo vsjá víki.

Tróičen: Trisvítloje božestvó, vo jedínoj sijájuščeje zarí, ot jedínaho trijipostásnaho jestestvá, rodíteľa beznačáľna, jedinojestéstvenno že Slóvo Otcú, i scárstvujuščaho jedinosúščnaho Dúcha, ótrocy blahoslovíte, svjaščénnicy vospójte, ľúdije prevoznosíte vo vsjá víki.

In Irmos: Pobidíteli mučíteľa i plámene, blahodátiju tvojéju bývše, zápovidem tvojím ziló priľižáše, ótrocy vopijáchu: blahoslovíte vsjá ďilá hóspodňa Hóspoda.

Na drévi rúci mňí prostérša, obnažénnaho mjá prizyvájušča, svojéju blahoobráznoju sohríjati nahotóju, blahoslovíte vsjá ďilá Hóspoda, i prevoznosíte jehó vo víki.

Iz preispódňaho áda voznésša mjá pádšaho, i vysokoprestóľnoju slávoju Rodíteľa počétšaho, blahoslovíte vsjá ďilá Hóspoda, i prevoznosíte jehó vo víki.

Ín. irmós: Carjá nebésnaho:

Soprotívnych razžžénnyja i plamenovídnyja na nás uhasí stríly, jáko da pojém ťá čístaja, vo vsjá víki.

Prejestéstvenňi soďíteľa i Spása, Bóha Slóva rodilá jesí Ďívo: ťímže ťá pojém vo vsjá víki.

Ín. irmós: Sedmeríceju péšč:

Rádujtesja múčenicy, prorócy, apóstoli, svjaščennomúčenik čestnýj sobóre: právednych, prepodóbnych že i učítelej božéstvennyj líče, s mironósicami ženámi sladkopojúšče: ótrocy blahoslovíte, svjaščénnicy vospójte, ľúdije prevoznosíte vo vsjá víki.

Jáže páče umá svítlostiju, nasyščájemi svjatíji božéstvennaho vesélija, i rádosti ispolňájemi, Bózi byvájete, k Bóhu približénijem, Bohoďíteľnym svítlostem obščájuščesja, i slávy neizrečénnyja prosvitívšesja lučámi, Christá prevoznosíte vo vsjá víki.

Bláhoslovím Otcá, i Sýna, i svjatáho Dúcha, Hóspoda.

Javívšesja svjatíji jáko zvízdy mnohosvítlyja, cerkóvnoje nébo ujasňájete razlíčnymi darováňmi i razlíčnymi dobrótami, v právďi, cilomúdriji, múžestvi, rázumi: Vladýku svjaščénnicy vospójte, ľúdije prevoznosíte vo vsjá víki.

I nýňi: S vesélijem vsjá žený Bohomúdryja, skončávšyjasja, pojút Dúchom Ďívu prečístuju, ístinnuju Máter Bóžiju, ot kľátvy pramátere Jévy nás Izbávivšuju, blahohovíjno predstojášče, tojá vospójte plód vo víki.

Chválim, blahoslovím, poklaňájemsja Hóspodevi, pojúšče i prevoznosjášče vo vsjá víki.

Katavásia: Ótroki bláhočestívyja:

Po 8.pisňi:

Jeréj: Bohoródicu i Máter svíta v písnech vozveličím:

Velíčit dušá mojá Hóspoda, i vozrdádovasja dúch mój o Bózi Spási mojém. (Včasi spivu ľude stojať)

Čestňíjšuju Chruvím i slavňíjšuju bez sravnénija Serefím bez istľínija Bóha Slova róždšuju, súščuju Bohoródicu ťá velčájem.

Jáko prizrí na smirénije rabý svojejá, se bo ot nýňi ublažát mjá vsí ródi.

Jáko sotvorí mňí velíčije síľnyj, i svjáto ímja jehó, i mílosť jehó v ródy rodóv bojáščymsja jehó.

Sotvorí deržávu mýšcejú svojéju, rastočí hórdyja mýsliju sérdca ích.

Nizloží síľnyja s prestól i voznesé smirénnyja, álčuščyja ispólni bláh, i bohaťáščyjasja otpustí tščý.

Vospriját Izráiľa ótroka svojehó, pomjanúti mílosti, jákože hlahóla k otcém nášym Avraámu i símeni jehó do víka.

Písň 9.

irmós: Užasésja o sém nébo, i zemlí udivíšasja koncý, jáko Bóh javísja čelovíkom plótski, i črévo tvojé býsť prostránňijšeje nebés. Ťím ťá Bohoródicu, ánhelov i čelovík činonačálija veličájut.

Božéstvennym i beznačáľnym jestestvóm próst sýj, složílsja jesí prijátijem plóti, v tebí samóm sijú sostáviv Slóve Bóžij, i postradáv jáko čelovík, prebýl jesí kromí strastéj, jáko Bóh. Ťímže ťá vo dvojú suščestvú nerzaďílno i neslijánno veličájem.

Otcá po suščestvú božéstvennomu, jákože jestestvóm býv čelovík, rékl jesí Bóha, výšnij rabóm snizchoďá: voskrés ot hróba, blahodátiju Otcá zemnoródnych polóž, íže po jestestvú Bóha že i Vladýku: s nímže ťá vsí veličájem.

Bohoródičen: Javílasja jesí, o Ďívo Máti Bóžija, páče jestestvá róždši plótiju Bóha Slóva, jehóže Otéc otrýhnu ot sérdca svojehó, préžde vsích vík jáko bláh, jehóže nýňi i ťilés prevýšša razumijem, ášče i v ťílo oblečésja.

In Irmos: Ustrašísja vsják slúch neizrečénna Bóžija snischoždénija, jáko výšnij vóleju sníde dáže i do plóti, ot ďívičeskaho čréva býv čelovík. Ťímže prečístuju Bohoródicu vírniji veličájem.

Bóžija ťá jestestvóm úbo Sýna, začátaho vo utróbi svímy Bohomátere, i bývšaho nás rádi čelovíka, i zrjášče ťá na kresťí, jestestvóm úbo stráždušča čelovíčeskim, bezstrástna že jáko Bóha prebyvájušča veličájem.

Razrušísja tmá drjáchlaja, ot áda bo vozsijá sólnce právdy Christós, zemlí prosviščája vsjá koncý, sijája božestvá svítom nebésnyj čelovík, Bóh zemnýj, jehóže vo dvojú jestestvú veličájem.

In Irmos: Voístinnu Bohoródicu ťá ispovídujem, spasénniji tobóju Ďívo čístaja, s bezplótnymi líki ťá veličájušče.

Rádosti i vesélija ispólň jésť pámjať tvojá, pristupájuščym iscilénija točášči, i blahočéstno Bohoródicu ťá vozviščájuščym.

Psalmý ťa vospivájem blahodátnaja, i nemólčno, jéže rádujsja, prinósim: tý bo istočíla jesí vsím rádosť.

In Irmos: Užasésja o sem nébo, í zemľá udivíšasja koncý: jáko Boh javisja čelovíkom plótski, i črévo Tvojé býsť prostránňijšeje nebes; ťim ťa Bohoródicu Anhélom i čelo­ vík činonačálija veličájut.

Nadéždeju i ľubóviju vooružénno, i vírno ohraždénno sčinénije izbránnych, vsjá mučítelej preščénija, múki, i rány rádujuščesja pretirpéša, blahoslávno ot Christá obohatívšesja, pobidotvorjáščaho v stradánijich ístiny pervomúčeniki.

Pristánišče spasénija, Krestíteľa, apóstoly, proróki i múčeniki s póstniki, Bóžéstvennyja učíteli i svjaščénniki, patrijárchov že sobránije, i svjaščennomúčeniki blahoslávnyja, žený Bohoľubívyja, prepodóbnyja i právednyja nýňi dostójno voschválim.

Sláva: Ohném iskusívšesja iskušénij, i slasťmí ne preľstívšesja rádujetesja čísťi, prestólu Vladýčňu svitovídnomu predstojášče, slávniji sobóri svjatých na nebesích, razrišívšymsja zercálom, síni že mimošédšej ístinnymi javléňmi.

I nýňi: Bohoródičen: Javílasja jesí razstojáščymsja sovokupíteľnaja: tobóju bo ánhelom jedinoséľnicy na nebesích čelovícy býša voístinnu, i sviďíteľstvujut čínove vsích svjatých, nýňi s ními pojúšče tvojé roždestvó Ďívo Bohoródice, vo víčnych písnech.

Katavásija: Vsják zemnoródnyj:

Po 9. pisňi.

(Diákon ilí jeréj hlahólet jekténiju sijú. Ášče mirján molítsja, hlahólet tokmó:

Hóspodi, pomíluj. (3x) Sláva, i nýňi:)

Páki i páki, mírom Hóspodu pomólimsja.

Lík: Hóspodi, pomíluj. (na jedínom kójemždo prošéniji)

Zastupí, spasí, pomíluj, i sochraní nás, Bóže, Tvojéju blahodátiju.

Presvjatúju, prečístuju, preblahoslovénnuju, slávnuju Vladýčicu nášu Bohoródicu i prisnoďívu Maríju, so vsími svjatými pomjanúvše, sámi sebé i drúh drúha, i vés živót náš Christú Bóhu predadím.

Lík: Tebí, Hóspodi.

Jerej: Jáko tebé chváľat vsjá síly nebésnyja, i tebí slávu vozsylájem Otcú i Sýnu i svjatómu Dúchu, nýňi i prísno i vo víki vikóv.

Lík: Amíň.

Svját Hospóď Boh náš. (hlás 8)

Lík: Svját Hospóď Boh náš. Svját Hospóď Boh náš. Svját Hospóď Boh náš.

Stích: Voznosíte Hospóda Boha našeho i poklaňájtesja podnóžiju nohú jeho, jáko svjáto jesť.

Lík: Svját Hospóď Boh náš. Svját Hospóď Boh náš. Svját Hospóď Boh náš.

Táže jeksapostilárij voskrésen: So učenikí vzýdem na hóru Haliléjskuju, víroju Christá víďiti, hlahóľušča vlásť prijáti výšnich i dólnich: naučímsja, káko účit krestíti, vo ímja Otcá, i Sýna, i svjatáho Dúcha, jazýki vsjá, i sprebyváti učenikóm, jákože obiščásja do skončánija.

Sláva: Svitílen vsím svjatým. Podóben: Krestíteľa i predtéču, apóstoly, proróki, múčeniki, svjaščennonačáľniki že, póstniki i prepodóbnyja, svjaščennomúčeniki, kúpno Bohoľubívyja žený i právednyja vsjá, i ánhelov číny, dólžno písňmi uvjazém moľáščesja, slávu sích polučíti ot Christá Spása.

I nýňi, Bohoródičen: Íže horí proslavľájemyj božéstvenňi ot ánhelov, ot ňídr Ótčich, prečístaja, ne otstúpľ neizrečénno, s dóľnimi poživé: tý že sehó bylá jesí spasénija chodátaica, ot čístych tvojích krovéj semú čístaja, páče slóva plóť zaimodávši. Jehóže molí rabóm tvojím izbavlénije dáti prehrišénij.

(Hlás 8.) Vsjakoje dychanije da chvalit Hospoda, chvalite Hospoda s nebes, chvalite jeho vo vyšnich. Tebi podobaje pisň Bože.

Chvalíte jehó vsí Ánheli jehó, chvalíte jehó vsjá síly jehó, tebí podobájet písň, Bóže.

Chvalíte jehó sólnce i luná, chvalíte jehó vsjá zvízdy i svít. - Chvalíte jehó nebesá nebés, i vodá jáže prevýše nebés, da voschváľat ímja Hóspodne. - Jáko tój rečé i býša, tój poveľí i sozdášasja. - Postávi já vo vík i vo vík víka, poveľínije položí i ne mímo idét - Chvalíte Hóspoda ot zemlí zmijéve i vsjá bézdny. - Óhň, hrád, sňíh, hóloť, dúch búren, tvorjáščaja slóvo jehó. - Hóry i vsí chólmi, dréva plodonósna i vsí kédry. - Zvírije i vsí skóti, hádi i ptícy pernáty. - Cáriji zémstiji i vsí ľúdije, kňázi i vsí sudijí zémstiji. - Júnoši i ďívy, stárcy s júnotami, da voschváľat ímja Hóspodne, jáko voznesésja ímja tohó jedínaho. - Ispovídanije jehó na zemlí i na nebesí, i voznesét róh ľudéj svojích. - Písň vsím prepodóbnym jehó, synovóm Izrailevym, ľúdem približjuščymsja jemu.

Psalóm 149

Vospójte Hospodévi písň nóvu, chvalénije jehó v cérkvi prepodóbnych. - Da vozveselítsja Izráiľ o sotvoršém jehó, i sýnove Sijóni vozrádujutsja o carí svojém. - Da voschváľat ímja jehó v líci, v tympáňi i psaltíri da pojút jemú. - Jáko blahovolít Hóspoď v ľúdech svojích, i voznesét krótkija vo spasénije. - Voschváľatsja prepodóbniji vo slávi, i vozrádujutsja na ložách svojích. - Voznošénija Bóžija v hortáni ích, i meči obojúdu ostrý v rukách ích. - Sotvoríti otmščénije v jazýcich, obličénija v ľúdech. - Svjazáti carí ích púty, i slávnyja ích ručnými okóvy žeľíznymi.

Psalóm 150

Stich: Sotvoríti v ních súd napísan, sláva sijá búdet vsím prepodóbnym jehó.

hlás 8: Hóspodi, ášče i sudílišču predstál jesí ot Piláta sudímyj, no ne otstupíl jesí ot prestóla so Otcém siďá: i voskrés iz mértvych, mír svobodíl jesí ot rabóty čuždáho, jáko ščédr i čelovikoľúbec.

Stich: Chvalíte Bóha vo svjatých jehó, chvalíte jehó v utverždéniji síly jehó.

Hóspodi, ášče i jáko mértva vo hróbi Judéji položíša: no jáko carjá spjášča vóini ťá strežáchu, i jáko životá sokróvišče, pečátiju pečátaša: no voskrésl jesí, i pódal jesí netľínije dušám nášym.

Stich: Chvalíte jehó na sílach jehó, * chvalíte jehó po mnóžestvu velíčestvija jehó.

Hóspodi, orúžije na dijávola krest tvój dál jesí nám: trepéščet bo i trjasétsja, ne terpjá vziráti na sílu jehó: jáko mértvyja vozstavľájet, i smérť uprazdní. Sehó rádi poklaňájemsja pohrebéniju tvojemú i vostániju.

Stich: Chvalíte jehó v hlási trúbňim, * chvalíte jehó v psaltíri i húsľich.

Ánhel tvój Hóspodi, voskresénije propovídavyj, stráži úbo ustraší, ženám že vozhlasí hlahóľa: čtó íščete živáho s mértvymi? Voskrése Bóh sýj, i vselénňij žízň darová.

Ína stichíra vostóčnaja anatólijeva tohóžde hlása:

Stich: Chvalíte jehó v tympáňi i líci, * chvalíte jehó v strúnach i orháňi.

Postradál jesí Krestóm, bezstrástnyj Bóžestvóm, pohrebénije prijál jesí tridnévnoje, da nás svobodíši ot rabóty vrážija, i obezsmértiv oživotvoríši nás Christé Bóže, voskresénijem tvojím čelovikoľúbče.

Íny stichíry vsím svjatým,

Stich: Chvalíte jehó v kymváľich dobrohlásnych, chvalíte jehó v kymváľich vosklicánija, * vsjákoje dychánije da chvalít Hóspoda.

hlás 4. Podóben: jáko dóbľa: Svjatýja Hospóď íže na zemlí udiví: tohó bo rány i stradánija v plóti vosprijáša, v sích krasjáščesja, i Božéstvennymi udobréňmi javlénno udobrjájemi: jáže vospojím jáko neuvjadájuščyja cvíty, jáko zvízdy nepreléstnyja cérkve, jáko vólnaja zakolénija.

Stích: Vozzváša právedniji, i Hospóď uslýša ích.

S proróki apóstoli, s prepodóbnymi učítelije, so svjaščennomúčeniki vsí právedniji, i žén postradávšeje, i ľubóviju postívšejesja svjatých mnóžestvo, i právednych čínove, da voschváľatsja svjaščénnymi písňmi, jáko hórňaho cárstvija nasľídnicy, jáko rajá žítelije.

Stích: Díven Bóh vo svjatých svojích, Bóh Izrájilev.

Íže zémľu onebesívšiji dobroďítelej svítlostiju, íže Christóvu smérť podražávšiji, bezsmértija chodátajstvennyj púť šéstvovavšiji íže strásti čelovíkom rukoďíjstvijem blahodáti očístivšiji, íže vo vsém míri jedinodúšno stradáľčestvovavšiji, dóblestvenňi da voschváľatsja múčenicy.

Sláva: stichíra útrenňaja Jevánhelskaja, 1-ja. Hlás 1: Na hóru učenikóm idúščym za zemnóje voznesénije, predstá Hospóď: i poklonívšesja jemú, i dánnyja vlásti vezďí naučívšesja, v podnebésnuju posyláchusja propovídati jéže iz mértvych voskresénije, i jéže na nebesá voznesénije: ímže i vo víki sprebyváti nelóžnyj obiščásja Christós Bóh i Spás dúš nášich.

I nýňi, hlás 2: Preblahoslovénna jesí, Bohoródice Ďívo: * voplóščšimbosja iz tebé, * ád pľinísja, Adám vozzvásja, * kľátva potrebísja, Jéva svobodísja, * smérť umertvísja, i mý ožíchom, * ťímže pojúšče vozopijém: * blahoslovén Christós Bóh náš, izvólivyj táko sláva tebí.

Jerej: Sláva tebí pokazávšemu nam svit.

Slavoslovije velikoje. (Včasi spivu ľude stojať)

Sláva v výšnich Bóhu, i na zemlí mir , v čelovícich blahovolénije. Chválim ťa, blahoslovím ťa , kláňajemtisja slavoslóvim ťa. - Blahodarim ťa, velikija rádi slávy tvojejá * Hóspodi Carjú nebésnyj. - Bóže Otče vsederžiteľu, Hóspodi Sýne jedinorodnyj , Isúse Christé, i svjatýj Dúše, Hóspodi Bóže. - Áhnče Bóžij, * Sýne Otč. - Vzémľaj hrich míra, * po­miluj nas. - Vzémľaj hrihí míra, * prijmi molitvy náša. - Siďaj odesnúju Otca, * pomiluj nas. - Jáko ty jedín svjat, ty jedín Hóspoď Isús Christós, * v slávu Bóha Otcá, amiň. - Na vsják deň blahoslovím ťa, * i voschválim ímja tvojé vo viki i vo vík vika. - Spodóbi, Hóspodi, v deň sej bez hrichá sochranítisja nam. Blahoslovén jesí, Hóspodi Bóže Otec nášich, * i chváľno i proslávlenno ímja tvojé vo víki, amiň. - Búdi, Hóspodi, mí­losť tvojá na nas, * jákože upováchom na ťa. - Blahoslovén jesí. Hóspodi, * naučí nas opravdánijem tvoím. - Blahoslovén jesí, Vladýko, * vrazumí nas opravdánijem tvoím. - Blahoslovén jesí, Svjatýj, * prosviti nas oprav-dánii tvoímí. - Hóspodi, prí­bížišče byl jesí nam, v rod í rod. - Az rich, Hóspodi, po­miluj mja: * i iscilí dúšu moju, jáko sohriších tebí. - Hóspodi, k tebí pribihóch, naučí mja tvoríti vóľu tvoju, jáko ty jesí Boh moj - Jáko u tebé jésť istóčnik života, * v svíťi tvojém uzrim svit. Probávi mílosť tvoju* víduščym ťa.

Svjatýj Bóže, svjatýj kripkij, svjatýj bezsmertnyj pomiluj nas. 3x.

Sláva, i nýňi: Svjatýj bezsmertnyj pomiluj nas.

Svjatýj Bóže, svjatýj kripkij, svjatýj bezsmertnyj pomiluj nas

Tropár po Slavosloviji:

hlás 1, 3, 5, 7. Dnés spasénije míru býsť, pojém voskrésšemu iz hróba, i načáľniku žízni nášeja, razrušív bo smértiju smérť, pobídu dadé nám i véliju mílosť.

hlás 2, 4, 6, 8. Voskrés iz hróba, i úzy rasterzál jesí áda, razrušív bo osuždénije smérti Hóspodi, vsjá ot sitéj vrahá izbávivyj, javívyj že sebé apóstolom tvojím, poslál jesí ích na própoviď, i ťími mír tvój podál jesí vselénňij, jedíne čelovikoľúbče.

Jerej: Pomíluj nás Bóže po velícij mílosti tvojéj, mólimtisja uslýši i pomíluj.

Lik: Hóspodi pomíluj 3x.

Jéšče mólimsja o svjaťíjšem vselénsťim Archijeréji (ímja rék), i o bohoľubívim Jepískopi nášem Kýr (ímja rék), o vsečestňíjšem otcí nášem Protoarchimandríťi (ímja rék), i Protoihúmeňi (ímja rék), Ihúmeňi (ímja rék), i o otcích nášich duchóvnych, i o vséj jéže vo Chrisťí brátiji nášej.

Hóspodi pomíluj. 3x

Ješčé mólimsja o predstojáščich ľúdech, i ožidájuščich ot tebé velíkija i bohátyja mílosti, za tvorjáščich nám mílostyňu, i za vsjá pravoslávnyja christijány.

Hóspodi pomíluj. 3x

Jerej: Jáko mílostiv i čelovikoľúbec Bóh jesí, i tebí slávu vozsylájem Otcú i Sýnu i svjatómu Dúchu, nýňi i prísno i vo víki vikóv.

Lik: Amíň.

Jekténija prositelnaja:

Jerej: Ispólnim utrénuju molítvu nášu Hóspodevi.

Lik: Hóspodi pomíluj.

Zastupí, spasí, pomíluj i sochraní nás, Bóže, tvojéju blahodátiju.

Hóspodi pomíluj.

Útra vsehó soveršénna, svjáta, mírna i bezhríšna, u Hóspoda prosím.

Podáj Hóspodi.

Ánhela míra, vírna nastávnika, chraníteľa dušám i ťílom nášym, u Hóspoda prosím.

Proščénija i ostavlénija hrichóv i prehrišénij nášich, u Hóspoda prosím.

Dóbrych i poléznych dušám nášym, i míra mírovi, u Hóspoda prosím.

Próčeje vrémja životá nášeho v míri i pokajániji skončáti, u Hóspoda prosím.

Christijánskija končíny životá nášeho, bezboľíznenny, nepostýdny, mírny, i dóbraho otvíta na strášňim sudíšči Christóvi, prosím.

Presvjatúju, Prečístuju, Preblahoslovén-nuju, slávnuju Vladýčicu nášu Bohoródicu i prisnoďívu Maríju, so vsími svjatými pomjanúvše, samí sebé, i drúh drúha, i vés živót náš Christú Bóhu predadím.

Tebí Hóspodi.

Jerej: Jáko Bóh mílosti i ščedrót i čelovikoľúbija jesí, i tebí slávu vozsylájem, Otcú i Sýnu i svjatómu Dúchu, i nýňi i prísno, i vo víki vikóv.

Lik: Amíň.

Mír vsím

I dúchovi tvojemú.

Hlavý váša Hóspodevi prikloníte.

Tebí Hóspodi.

Jerej hlahólet molítvu sijú tájno: Hospodi svjatýj, vo výšnich živýj, i na smirénnyja prizirájaj, i vsevíďaščim ókom Tvojím prizirájaj na vsjú tvár, Tebí prokloníchom výju sérdca i ťilesé, i mólimsja Tebí: prostrí rúku Tvojú nevídimuju ot svjatáho žilíšča Tvojehó, i blahosloví vsja ný. I ášče čtó sohrišíchom vóleju ilí nevóleju, jáko bláh i čelovikoľúbec Boh prostí, dáruja mirnaja i premirnaja blahaja Tvoja.

Jerej: Tvóje bo jest jéže mílovati i spasáti ný Bóže i tebí slávu vozzsylájem, Otcúi Sýnu i svjatómu Dúchu, nýňi i prísno, i vo víki vikóv.

Lik: Amíň.

Diákon: Premúdrosť.

Lík: Blahosloví.

Jeréj: Syj blahoslovén Christós Bóh náš, vsehdá, nýňi i prísno, i vo víki vikóv.

Lík: Amíň. Utverdí, Bóže, svjatúju pravoslávnuju (ilí katholíčeskuju) víru, vo víki vikóv.

Jeréj: Presvjatája Bohoródice, spasí nás.

Lík: Čestňíjšuju Cheruvím i slávňijšuju béz sravnénija Serafím, béz istľínija Bóha Slóva róždšuju, súščuju Bóhoródicu ťa veličájem.

Jeréj: Sláva tebi, Christé Bóže, upovánije náše, sláva tebí.

Lík: Sláva Otcú, i Sýnu, i svjatómu Dúchu, i nýňi i prísno, i vo víki vikóv. Amíň. Hóspodi, pomíluj (3x). Blahosloví.

Jeréj: Voskrésyj iz mértvych, Christós ístinnyj Bóh náš, molítvami prečístyja svojejá Mátere, svjatých slávnych i vsechváľnych apóstol . . . i vsích svjatých, pomílujet i spasét nás, jáko bláh i čelovikoľúbec.

Lík: Amíň.

Ášče mírjan molítsja, hlahólet tókmo: Čestňíjšuju Cheruvím: Sláva, i nýňi: Hóspodi, pomíluj (3x) Hóspodi, blahosloví. Molítvami svjatých otéc nášich, Hóspodi Iisúse Christé Bóže náš, pomíluj nás. Amíň.